Токиогийн олимпын наадмын бамбарын буухиа өнгөрсөн Гурадугаар сарын 25-наас аян замдаа гараад байгаа билээ.
Тэгвэл хүн төрөлхтний эв нэгдлийн бэлэгдэл олимпын наадмын бамбарын буухианд Монгол залуу оролцохоор болжээ.
Японы Тоттори мужийн Тоттори хотын олимпын бамбарын буухианд оролцох сүмо бөхийн дасгалжуулагч Р.Гантөгс нь "Тоттори Жёохокү" ахлах сургуулийн багш бөгөөд Монгол Улсын нэрийн өмнөөс сүмо бөхийн Дэлхийн болон Азийн аваргын тэмцээнд оролцож байсан аж.
Тэрээр Монголын сонирхогчдын сүмо төдийгүй мэргэжлийн сүмод ч маш их гавьяа байгуулж нэгэн юм. Түүний олон шавь одоо мэргэжлийн сүмод хүч сорьж байна. Тодруулбал, озэки Тэрүнофүжи, Ичиножёо, Миторюү, Роога нар билээ.
Р.Гантөгс энэ сарын 22-нд 19:00 цагаас Тоттори хотын бамбарын буухианд оролцох бөгөөд тус хотод нийт 40 хүн гүйх юм. Тодруулбал, Тоттори мужаас төрсөн олимп, дэлхийн медальтнууд, Токиогийн олимпод оролцох тамирчид сонгогдож, үлдсэн эрхийг нутгийн иргэдэд сугалаагаар олгожээ.
Олимпын бамбар Японы нийт 47 мужаар аялаад, Долоодугаар сарын 23-нд Токиод хүрч, олимпын наадам дуустал Токиод асах ажээ.
