АНУ-ын гадаад улс орнуудад ажиллуулдаг био лабораториудын талаар ОХУ-ын гадаад хэргийн сайд Сергей Лавров баасан гаригт “Аль Арабия” телевизийн сувагт өгсөн ярилцлагадаа хэлснийг mid.ru мэдээлжээ. Ярилцлагын үеэр тэр Монгол улсын нэрийг ч мөн дурдсан байна.
Сергей Лавров “Дэлхий даяар АНУ-ын биологийн зэвсгийн лабораториуд хэдэн зуугаараа бий. АНУ-ын төрийн нарийн бичгийн даргын орлогч Уолтер Нуланд "өвчин үүсгэгчийг Оросын гарт оруулахгүйн тулд шаардлагатай бүхнийг хийсэн" гэж хэлсэн нь санамсаргүй хэрэг биш. Тэд энхийн бус зориулалттай зүйл хийж байгаагаа хүлээн зөвшөөрсөн. Тэд Орос, Хятадын эргэн тойронд лаборатори байгуулж байна. Тэд бүр Монголыг энэ "тоглоомдоо" татаж оруулахыг оролдсон. Бидэнд мэдээлэл бий” хэмээн ярьсан байна.
Монгол улсын нутаг дэвсгэрт АНУ-ын засаг захиргаа био лаборатори байгуулах талаар ярилцаж байгаа тухай Оросын зарим улс төрчид сүүлийн үед ярих болсон юм. Энэ нь гадагшаа хийж буй мэдэгдэл гэхээсээ дотооддоо хийж буй улс төр, иргэдийнхээ өмнө дайны ажиллагааг зөвтгөх гэсэн зорилготой гэдгийг манай ажиглагчид хэлж байгаа. Мөн Монгол Улсын Гадаад Хэргийн Яам үүнийг няцаасан мэдэгдлийг дөрөвдүгээр сарын 18-ны өдөр гаргасан билээ.
