АНУ-ын хууль хяналтынхан армийн түрүүч асныг Хятад улсад үндэсний батлан хамгаалахын мэдээлэл дамжуулахыг завдсан хэргээр бямба гаригт баривчлан саатуулсан байна. Америкийн хууль зүйн яамны мэдээлснээр 29 настай Жозеф Даниэл Шмит 2015-2020 оны хооронд тагнуулын батлионд алба хааж, маш нууц мэдээлэлд нэвтэрч байсан юм байна.

Жозеф Даниэл Шмит Хятад улсад тэр дундаа Хонгконгод багагүй хугацаанд амьдарч байгаад бямба гаригт АНУ-д эргэн ирсэн юм байна. Түүний Сан Францискод газардах үед нь баривчилжээ. Америкийн хууль зүйн яам түрүүч армиас халагдсаны дараа Турк дэх Хятадын консулын газар, дараа нь Хятадын аюулгүйн албатай цахим шуудангаар холбогдож, Үндэсний батлан хамгаалахын мэдээлэл өгөх санал тавьсан гэж мэдээлсэн байна. Түүнчлэн тухайн цэрэг армийн компьютерын хамгаалалттай сүлжээнд нэвтрэх боломжтой төхөөрөмж хадгалж байсан. Тэрхүү төхөөрөмжийг Хятадын талаас сүлжээнд нэвтрэхэд нь туслах зорилгоор түүнд санал болгосон гэж Америкийн хууль хяналтынхан үзэж байгаа юм байна.

Өөрөөр хэлбэл Үндэсний батлан хамгаалахын мэдээлэл дамжуулахыг оролдоод зогсохгүй, гадны улсад батлан хамгаалах яамны хамгаалалтай сүлжээнд нэвтрэхэд нь туслах мэдээлэл өгөх зорилготой байсан гэсэн дүгнэлтэд хүрчээ. Хэрвээ түүнийг шүүхээс гэм буруутай гэж үзвэл 20 хүртэлх жилийн ял оноох юм байна.

Үүнээс өмнө Америкийн тэнгисийн цэргийн хоёр алба хаагч Хятад улсад мөн л нууц мэдээлэл задруулсан хэргээр баривчлагдсаныг Хууль зүйн яам нь өнгөрөгч наймдугаар сард мэдээлжээ.

Монголын мэдээ агентлаг