Өнгөрөгч баасан гаригт УИХ дахь АН-ын бүлэг Хөрөнгө оруулалтын тухай хуулийн шинэчилсэн найруулгын төслийг хэлэлцэх эсэхээс гурван хоногийн хугацаатай завсарлага авсан. Завсарлагын хугацаа өнөөдөр дууссан бөгөөд УИХ дахь АН-ын бүлгийн дарга О.Цогтгэрэл чуулганы нэгдсэн хуралдаан дээр дараах мэдээллийг хийлээ. 

О.Цогтгэрэл:

-"Завсарлагааны хугацаанд Хөрөнгө оруулалтын тухай хуулиар АН-ын бүлгийн санал, байр суурийг нэгтгэсэн. Гадаадын хөрөнгө оруулалт өрийг нэмэгдүүлэхгүйгээр экспортын бүтээгдэхүүн гаргах давуу талтай. Гэсэн ч уг хуулийн төсөлд хариуцлагагүй олон зүйл заалт орж ирсэн. АН-ын бүлгийн байр суурь бол эдийн засагт төрийн оролцоо хамгийн бага байх ёстой. Гэтэл энэ хуулиар төрийн оролцоо хэмжээ хязгааргүй болж байгааг бид ярилцах ёстой. Энэ асуудлыг хоёр хүний хэрүүл мэтээр булзааруулаад өнгөрч болохгүй. Засгийн газар Хөрөнгө оруулалтын тухай хуулийн төслөө яаралтай горимоор татаж авч, дахин өргөн барих ёстой гэдэг дээр манай намын бүлэг нэгтгэсэн" гэв. 

УИХ-ын дарга Г.Занданшатар:

-"Хөрөнгө оруулалтын тухай хуулийг хоёр хүний хэрүүл болгож болохгүй. Х.Баттулга, Ч.Хүрэлбаатар нийгмийг талцуулахаа болих хэрэгтэй. Хэдэн троллоороо гишүүдийг шантаажилж байгаад хууль батална, эсвэл зогсооно гэж байхгүй. Нэг тал нь "Үндсэн Хуулийн Цэцэд өгнө" гээд, нөгөө нь "Зургаан сар саатууллаа" гээд байдаг. Үндсэн Хуулийн Цэцэд өгөөд байгаа нөхөд 2013 онд "100 жилээр эзэмшүүлэх, ашиглах" хуулийг баталсан. Одоо ямар хууль зөрсөн гээд гүйгээд байгаа юм. Ард түмнийг талцуулдгаа болих хэрэгтэй" гэв.