Оросын тэрслүү үзэлтэн амиа алдсан Харпын засан хүмүүжүүлэх газар юугаараа нэр цуутай вэ?

Харп суурин ба Собь гол шувууны нислэгийн өндрөөс харахад. Зургийн  төвөөс ялимгүй баруунд голын цаана алст «Туйлын чоно» засан хүмүүжүүлэх №3 байрлажээ.

Эх сурвалж: Яндекс. Газрын зураг

Өнөөгийн Оросын гол "тэрслүү үзэлтэн" гэгдэх, Оросын засгийн газрын албан ёсны мэдээгээр бол "татвараас зугтсан, мөнгө завшсан" гэх хэргийн гол буруутан, хожим "экстримист бүлэглэл байгуулах гэсэн, Оросын эсрэг уриалан тэрсэлсэн"  хэргээр нэмж 19 жилийн ял авсан Алексей Навальный нас барсан тухай Ямало-Ненецкийн автономын тойргийн Оросын шүүхийн шийдвэр биелүүлэх албаны салбараас (УФСИН) хоёрдугаар сарын 16-нд  мэдээлжээ.

Мэдээнд  тэр тухай бичихдээ:

“Ял эдлэгч салхинд гарсны  дараа гэнэт бие нь муудан ухаан алджээ. Түргэн тусламжийн эмнэлэгийн бригад дуудсан ба эмч нар шуурхай арга хэмжээ авч түүнийг сэхээн амьдруулахаар оролдсон нь бүтэлгүй болж тэр ухаангүй байсаар нас барсаныг түргэний эмч нар бүртгэгдсэн” гэсэн.

Тэрслүү  үзэлтэн улстөрч  сүүлийн саруудаа  Туйлын задигийн цаана, мөнхийн  цэвдгийн нөхцөлд, Харп суурин дэх  онцгой дэглэмтэй, эрэгтэйчүүдийн  засан хүмүүжүүлэх колони-3-т өнгөрөөжээ. Ямала-Ненецкийн автономын тойргийн энэ ЗХ-№3 нь Оросын хамгийн хойд хэсгийн шоронгуудын нэг юм. Өмнө нь тэнд ГУЛАГ-ын 501-р байгууламж байв. Харп гэдэг нь немец хэлээр “туйлын туяа” гэж орчуулагдана. Ийм л туйлын “романтик” юм.

Эхлээд Навальный  “Кировлес” компанийн 10 мянган тонн бэлтгэлийн модыг завшсан, Ив Роше компанитай холбоотой  гэх  хэргээр Владимир мужийн  Ковровскийн районы  Мелехово суурин дэх ЗХ-№6-д  өмнө нь тэнсэн болгосон байсан таван жилийн ялаа эдэлж байв. Харин өнгөрсөн оны наймдугаар сард шүүх  түүнд терроризмыг сурталчлан хэт дэврэх ажиллагаанд уриалж,  экстрем байгууллагыг санхүүжүүлсэн хэргээр 19 жилийн ноогдуулжээ. Навальныйг өнгөрсөн арванхоёрдугаар сард Оросын хамгийн хойд  хэсгийн шоронд ялыг нь эдлүүлэхээр хүргэсэн байв.

“Туйлын чоно” гэж ямар шорон байна вэ?

Харпын колони №3-ыг “Туйлын чоно”, эсвэл “Ямалийн гурвал”гэж нэрлэдэг. Өмнө “хувьсгалын эсэргүү нарыг НАХЯамны гурвал шүүдэг байснаас гурвал нэрийг гаргасан болов уу. Энэ шоронд одоо одоо 700 хоригдол байгаа ба уг нь колони 1020 хүний багтаамжтай.  Хорих хугацаа ихтэй, 20 жилээс дээш ял авсан ялтнууд  байдаг.

Хатуу чанд, гэхдээ тэнд ял эдэлсэн хүмүүс "бусад шоронгуудаас  тийм ч хатуу биш" гэдэг. Засан хүмүүжүүлэх үүрэгтэй учраас хөдөлмөрлөх нь  их. Буганы арьсаар хүртэл сувенир бэлтгэдэг.  Тэд өөрсдийн хүчээр Сергей Радонежийн сүмийг босгосон байна.

Жилд хоёр удаа богино хугацаагаар, нэг удаа урт хугацаагаар ар гэрийнхэнтэй нь уулзуулдаг. Онцгой дэглэмийн гэдэг нэр нь өөрөө  тэнд ямрыг хэлээд өгнө. Өдөрт нэг удаа гадаалуулдаг. Яг энэ үеэрээ л Навальныйн бие муудан унажээ. Тэр нь тромбозын бөглөрөлт байсан бололтой. Энэ хүний үхэл ихээхэн дуулиан босгох учраас түүнийг нас барсан шалтгааныг тогтоохоор тийш нь УФСИН  тусгай хэсгийг илгээжээ. 

“Туйлын чоноос” оргоно гэж байхгүй. Эргэн тойрон тайгатай. Бэлтгэл сургуульгүй хүн шалгаран амьд гарахааргүй орчин гэнэ.

М.Цогт