Гуравдугаар сарын 21-22 өдрүүдэд явагдах Европын холбооны саммит эдийн засгаа дайны байдалд оруулах, нөхөрлөлийн орнуудын зэр зэвсгийн зардлыг нэмэгдүүлэх болон Украинд сум хэрэгсэл нийлүүлэх асуудлын талаар шийдвэр гаргана. Энэ тухай Европын зөвлөлийн тэргүүн Шарль Мишель оролцогч орнуудын төлөөлөгчдийг урьсан захидалдаа дурьдсаныг хэвлэлийн алба сайтдаа нийтэлжээ.
"Батлан хамгаалах, аюулгүй байдлын хувьд тогтсон журам дүрмийг өөрчлөх цаг ирлээ. Одоо бид батлан хамгаалах чадвартай болохын тулд эрс өөр тодорхой арга хэмжээ авч ЕХ-ны эдийн засгийг дайны байдалд оруулах хэрэгтэй. Тэр нь их зарлага гаргаж, их зэвсэг худалдан авна гэсэн үг юм" гэж Мишель бичжээ.
Европын холбооны гол зорилтуудын нэг нь Украинд цэргийн тусламжийг яаралтайгаар хүргэх асуудал гэж тэр онцолсон байв.
Мишель өмнө нь гуравдугаар сарын 18-нд Euractiv порталд өгүүлэл бичихдээ, Энх тайвныг хүсвэл дайнд бэлтэг, 2030 он гэхэд ЕХ-ны орнууд зэвсгийн үйлдвэрлэлийг дэмжихийн тулд олон жилийн гэрээ байгуулах ёстой. Батлан хамгаалахын үйлдвэрлэлд хөрөнгө оруулах нь өндөр үнэтэй, гэхдээ үүнгүйгээр цэргийн үйлдвэрлэлийг өргөжүүлэхгүй гэсэн байлаа.
М.ЦОГТ
