Гүржийн парламентаас баталж, Ерөнхийлөгч нь хориг тавьсан “Оросын хууль”-ийг эсэргүүцэгчид баасан гаригийн орой Тбилисид олон мянган хүний жагсаал хийлээ. Тэд гартаа хүчний байгууллагынханд зодуулсан идэвхтнүүд болон сөрөг хүчнийхний гэрэл зургийг барьж Эрх чөлөөний талбайгаас Дотоод хэргийн яамны байр хүртэл жагсаал хийсэн байна. Энэ хооронд Гүржийн парламент Ерөнхийлөгчийн хоригийг хүчингүй болгохоор бэлтгэж байгаа аж.
Баасан гаригт болсон жагсаал нь жагсагчдын эсрэг цагдаа нарын хүчирхийллийг эсэргүүцэн, баривчлагдсан болон шархадсан хүмүүстэй эв санааны нэгдлээ илэрхийлсэн юм. Жагсагчдын өмнө хууль сахиулах байгууллагынханд хандсан “Гүрж улсынхаа төлөө зүтгэ!” гэсэн уриалга бүхий асар том тугийг барьсан ба Европын Холбоо, Гүрж улсын далбаа ч харагдаж байв. Өмнөх жагсаалтай харьцуулахад АНУ-ын далбаатай жагсагчид илт олон байжээ.
Дотоод хэргийн яамны байрны өмнө жагсагчид цагдаагийн хамгаалалттай тулсан боловч энэ удаа цагдаа нар ч, жагсагчид ч тайван байсан нь содон зүйл болов. Тэр ч байтугай, Гүрж улсад сар гаруй хугацаанд үргэлжилж буй “Гадаадын нөлөөллийн ил тод байдлын тухай” хуулийг эсэргүүцсэн энэ удаагийн жагсаалын үеэр цагдаа нар хуяг дуулга, бамбай өмсөөгүй байна.
