БНХАУ-ын дарга Ши Жиньпин 2017 онд айлчлах үеэрээ Финланд улсад бэлэглэсэн хоёр хулсны баавгайг Хятадад буцаан өгөхөөр болсон тухай “Эхтяри” амьтны хүрээлэнгээс мэдээлжээ.
“Бид Хятадын түншүүдээсээ чухал тусламж дэмжлэгийг хүлээн авсан билээ. Бидний зорилго бол олон улсын хөтөлбөрийн хүрээнд аварга пандаг хамгаалах явдал байсан. Харамсалтай нь, бид панда баавгайнуудыг буцаан өгөх шийдвэрийг гаргахаас аргагүйд хүрлээ” гэж тус амьтны хүрээлэнгийн дарга Ристо Сивонен ярьсан байна.
Ийм шийдвэр гаргах болсны шалтгаан нь коронавирусний цар тахал болон Украинд үүссэн нөхцөл байдлын улмаас жил бүр ирэх жуулчдын тоо буурсан, мөн инфляц болон бодлогын хүү өссөн зэрэг олон хүчин зүйлтэй холбоотой ажээ. Санхүүгийн нөхцөл байдлаас шалтгаалан амьтны хүрээлэнгийнхэн панда баавгайнуудыг үргэлжлүүлэн тэжээх боломжгүй болсон байна. Хулсны баавгайнуудыг энэ онд багтаан буцаах ажээ.
БНХАУ-ын дарга Ши Жиньпин 2017 онд Финландад айлчлах үеэрээ бэлэглэсэн хулсны баавгайнуудыг 2018 оны нэгдүгээр сарын дундуур Хельсинки хотод, дараа нь Финландын нийслэлээс 350 км-ын зайд орших "Эхтяри" амьтны хүрээлэнд аваачжээ.
Дундуураа урсдаг голтой асар том газрыг амьтдад зориулан гаргаж, тусгай павильон босгон “Пандагийн байшин” хэмээн нэрлэжээ. Хулсны баавгайнуудыг авчирсны дараа амьтны хүрээлэн жил бүр 280 мянган зочин хүлээж авна гэж тооцоолж байв. Пандануудыг Финландад 15 жилийн түрээсийн гэрээгээр илгээжээ.
