Японы Сизүоки хотын тойргийн шүүхээс хүний амь хөнөөсөн хэргээр цаазын ял сонссон 88 настай, мэргэжлийн боксчин асан Ивао Хакамадаг цагаатгах шийдвэрийг өнөөдөр гаргалаа.

Тэрбээр цаазлуулах ялтнуудыг хорьдог өрөөнд 48 жилийг өнгөрүүлсэн байна.

Хакамадаг 1966 онд баривчилж, өөрийн ажиллаж байсан үйлдвэрийн дарга, түүний эхнэр, хоёр хүүхдийн амийг хөнөөсөн хэрэгт буруутгасан юм. Мөрдөн байцаалтын явцад тэрбээр хэргийг үйлдсэнээ хүлээн зөвшөөрсөн боловч шүүх хурлын үеэр “эрүүдэн шүүсний улмаас хэргийг хүлээсэн” гэж мэдэгджээ.  Мөн хэргийн нотлох баримтуудыг хуурамчаар үйлдсэн гэж Хакадамагийн өмгөөлөгчид баталсаар байсан боловч 1968 оны есдүгээр сард түүнийг буруутай хэмээн үзэж цаазын ял оноожээ. 1980 онд ялыг эцэслэн баталсан байна.

2011 онд Ивао Хакамадаг цаазлуулах ялтнуудын камерт хамгийн удаан хугацаагаар хоригдсон хүн хэмээн Гиннесийн номонд тэмдэглэжээ. 2014 онд хэргийн газраас бэхжүүлэн авсан цусны ДНХ нь Хакамадагийн цусны ДНХ-тэй тохирохгүй байгааг тогтоосны дараа түүнийг сулласан байна. Гэвч 2023 онд Японы Дээд шүүх доод шатны шүүхүүдийн шийдвэрийг хүчинтэй хэвээр үлдээж, шүүх хурлыг мөн оны 10 дугаар сард дахин явуулахаар шийдвэрлэжээ.   

Хакамадаг цагаатгасан нь дэлхийн II дайнаас хойших хугацаанд цаазын ял сонссон шүүгдэгчийн хэргийг дахин хянан хэлэлцэж шийдвэр гаргаж буй тав дахь тохиолдол юм. Хамгийн сүүлд 35 жилийн өмнө ийм шийдвэр гаргаж байсан юм.