Германы Фридрих Эбертийн сангийн урилгаар Ноттингемийн их сургуулийн профессор Фернандо Касаль Бертоа улс төрийн намын санхүүжилтын талаар харьцуулсан судалгааны тайлангаа танилцууллаа.
Уг судалгааг ном болгон хэвлүүлсэн бөгөөд өнөөдөр МУИС-ийн төв байрны дугуй зааланд Улс төр судлалын танхимын багш, оюутнуудад номоо танилцуулж, хэлэлцүүлэг өрнүүлжээ.
Судалгаанд ЗХУ-ын задралын дараах Гүрж, Армени, Казакстан, Киргизстан, Монгол зэрэг орнуудын улс төрийн намын төлөвшлийг харуулсан байна.
Фернандо Касаль Бертоа:
-"Монгол Улсад улс төрийн намын талаар эрх зүйн зохицуулалт бий. 2005 онд Улс төрийн намын тухай хуулийг баталсан. 2025 оноос Улс төрийн намын тухай шинэ хууль хэрэгжиж эхэлснээр илүү сайн зохицуулалтууд бий болно.
Гэвч өнгөрсөн хугацаанд улс төрийн намын санхүүжилттэй холбоотой хэд хэдэн асуудал гарч байсан. Тухайлбал намууд төсвийн хөрөнгийг улс төрийн зорилгоор ашиглаж байсан. Төсвийн хөрөнгөөр сонгогчдын саналыг худалдаж авах нөхцөл байдал ихээхэн ажиглагдаж байсан. Мөн санхүүжилтийн ил тод бус байдал, авилгын асуудал гарч байсан. Товчхондоо өнгөрсөн хугацаанд Монголд улс төрийн намын санхүүжилтын орчин хангалттай сайн байсангүй" хэмээн дүгнэсэн байна.
