АНУ Израилын “Төмөр дээвэр” агаарын довтолгооноос хамгаалах цогцолбортой ижил төстэй хамгаалалтын системийг зохион бүтээж эхлэх гэж байгаагаа Ерөнхийлөгч Дональд Трамп зарлалаа. Тэрбээр Майамид болсон Бүгд найрамдах намын хурал дээр энэ тухай мэдэгдэж, “Бид америкчуудыг хамгаалж чадах орчин үеийн “Төмөр дээвэр”-ийг АНУ-д яг энд бүтээнэ” хэмээн онцолжээ.

Энэхүү шинэ хамгаалалтын систем нь ойрын зайн пуужингуудыг амдан устгахад зориулагдсан Израилын “Төмөр дээвэр” системийн технологийг ашиглах үндсэн дээр бүтээгдэнэ. Гэвч түүний гол зорилго нь АНУ-ын нутаг дэвсгэрт аюул учруулж болох пуужингуудыг илрүүлж, устгахад оршино. Ерөнхийлөгч Трамп өмнө нь сонгуулийн кампанит ажлынхаа үеэр энэ талаар амласан бөгөөд уг системийг бүтээх ажлыг эхлүүлэхийг нэн тэргүүний зорилт гэж үзэж байгаагаа энэ удаад баталсан байна.

“Төмөр дээвэр” цогцолборыг Израил АНУ-ын дэмжлэгтэйгээр 2011 онд нэвтрүүлж эхэлсэн. Тус систем нь Газын зурвасаас болон Ливанаас харвасан олон мянган пуужинг илрүүлж, амдан устгасан амжилттай түүхтэй. Аравдугаар сарын 7-нд ХАМАС бүлэглэл Израил руу дайрах үеэр мөн энэ системийг ашиглан дайсны олон пуужинг сөнөөсөн тухай мэдээлэл гарсан.

Гэхдээ АНУ-д төлөвлөж буй хувилбар нь илүү өргөн цар хүрээг хамрах шаардлагатай байгаа юм. Израилын “Төмөр дээвэр” систем нь богино зайн пуужингуудыг устгахад онцгой үр дүнтэй ч АНУ-ын хувьд гол аюул учруулж буй тив хоорондын баллистик пуужингуудыг амдан устгах чадвартай байх шаардлага тулгарч байгаа билээ.

Ерөнхийлөгч Трамп энэхүү төслийг эхлүүлэх тухай зарлигт гарын үсэг зурахыг баталснаас гадна батлан хамгаалахын шинэ сайд Пит Хегсет ажлаа хүлээж авсан өдөр "Америкийн үндэсний аюулгүй байдлыг хангахад хамгийн чухал алхам" гэж онцлон хэлжээ.

Энэхүү шинэ системийг бүтээн байгуулснаар АНУ өөрийн агаарын довтолгооны эсрэг хамгаалалтыг улам бүр бэхжүүлж, стратегийн давуу байдалд хүрэх зорилготой ажээ.

Эх сурвалж: VOA