Швейцар болон Узбекистан улсууд Ерөнхийлөгч асан Ислам Каримовын том охин Гульнара Каримовагаас хураан авсан 182 сая ам.долларыг Узбекистан улсад буцаан шилжүүлэхээр тохиролцож, холбогдох баримт бичигт гарын үсэг зурлаа.
Уг тохиролцоог Узбекистаны Хууль зүйн сайд Акбар Тошкулов, Швейцарын элчин сайд Константин Оболенский нар албан ёсоор баталгаажуулсан бөгөөд дээрх хөрөнгийг Узбекистаны "Uzbekistan Vision 2030" сан руу шилжүүлж, нийгмийн төслүүдэд зарцуулахаар төлөвлөсөн байна.
Гульнара Каримова болон түүний хөрөнгийн асуудал
- 2012 онд Узбекистаны хэсэг иргэдийн хууль бусаар олсон хөрөнгийг Гульнара Каримоватай холбоотой эрүүгийн хэргийн мөрдөн шалгалтын явцад Швейцарын Ерөнхий прокурорын газар хураан авсан.
- 2020 онд Швейцарын тал Гульнарагаас хураан авсан 131 сая ам.долларыг Узбекистан улсад шилжүүлсэн.
- Одоогийн байдлаар Швейцарт царцаагдсан Гульнара Каримовын хөрөнгийн хэмжээ 850 сая евро бөгөөд 1.4 тэрбум ам.долларыг хилийн чанадад гаргасан талаар gazeta.uz мэдээлжээ.
Гульнара Каримовын шоронгийн ял
Талийгаач ерөнхийлөгч Ислам Каримовын охин Гульнара Каримова нь улсын хөрөнгийг шамшигдуулсан, бусдыг айлган сүрдүүлсэн, мөнгө угаасан, татвараас зайлсхийсэн хэргээр Узбекистаны шоронд хоригдож байна.
Эх сурвалж: DW
