Согтууруулах ундаа хэрэглэсэн үедээ бусдын биед халдаж, гэмтэл учруулсан гэмт хэргүүд цөөнгүй бүртгэгдэж байна. Өнгөрсөн нэг сарын хугацаанд энэ төрлийн гэмт хэрэг 1090 удаа бүртгэгджээ.
Тухайлбал, 2024 оны хоёрдугаар сарын 9-ний өдөр л гэхэд согтуугаар үйлдэгдсэн 18 гэмт хэрэг бүртгэгдсэн байна. Үүнд:
- 29 настай эрэгтэй Э нь танил М-тэй маргалдаж, баруун хөлийг нь хугалсан,
- 29 настай эрэгтэй Л хамт архи ууж байсан эмэгтэй А-гийн толгой руу төмрөөр цохисон,
- Иргэн Г найз Б-д зодуулж, үүдэн шүдээ хугалуулсан гэх мэт хэргүүд багтаж байна.
Эдгээр гэмт хэргийн гол шалтгаан нь:
- Архи согтууруулах ундаа хэтрүүлэн хэрэглэх,
- Хувийн таарамжгүй харилцаанаас үүдэлтэй маргаан,
- Уур бухимдлаа хянахгүй, үл ойлголцол үүсгэх зэрэгтэй холбоотой гэж үзэж байна.
Иймд Цагдаагийн байгууллагаас иргэдийг архи хэтрүүлэн хэрэглэхээс татгалзах, бусдыг хүндэтгэх, түргэн уур, бухимдлаа хянаж, гэмт хэрэгт холбогдохоос сэргийлэхийг уриалж байна. Энэ нь зөвхөн хууль, хариуцлагын асуудал биш, өөрийн болон бусдын эрүүл мэнд, санхүүгийн эрсдэлээс хамгаалах чухал алхам гэдгийг онцолжээ.
Эх сурвалж: Цагдаагийн Ерөнхий Газрын Хэвлэл, Мэдээллийн Төв
