Герман улсын Вуппертал хотын тойргийн шүүх авто уралдаанч асан Михаэл Шумахерын гэр бүлийг сүрдүүлэн мөнгө нэхсэн гурван этгээдийг буруутай гэж үзэж, ял оноолоо.
Хэргийн гол сэжигтэн “бусдыг сүрдүүлэн мөнгө авсан” хэргээр гурван жилийн хорих ял авсан бол түүний хүү зургаан сарын тэнсэн харгалзах ял сонсжээ. Мөн Шумахерын гэр бүлийн бие хамгаалагчаар ажиллаж байсан нэгэн этгээд сүрдүүлэн мөнгө нэхэх ажиллагаанд хамсаатан болж оролцсон хэмээн буруутгагдаж, хоёр жилийн хорих ял авсан байна.
2024 оны есдүгээр сард шүүх хуралдаанаар тус хэрэгт гурван хүн яллагдагчаар татагдсан. Тэд Шумахерын гэр бүлээс 15 сая евро нэхэж, уг мөнгийг төлөхгүй бол өвчний түүх, эмийн жор, хувийн зураг, бичлэг зэрэг баримтуудыг даркнэтэд нийтэлнэ хэмээн сүрдүүлжээ.
Шантааж үйлдсэн этгээдүүдийн нэг нь Шумахерын гэр бүлийн бие хамгаалагчаар таван жил гаруй ажиллахдаа 1500 гаруй хувийн зураг, эмчилгээний түүхийг хууль бусаар цуглуулсан байжээ. Өрөнд орсныхоо улмаас ийм хэрэг үйлдсэн гэдгээ тэрбээр хүлээн зөвшөөрсөн байна.
Энэ бол Шумахерын гэр бүлийг шантаажилсан анхны тохиолдол биш юм. Өмнө нь 2017 онд түүний эхнэрээс 900 мянган евро нэхсэн нэгэн этгээд мөн ял сонсож байжээ.
Формула 1-ийн 7 удаагийн дэлхийн аварга Михаэл Шумахер 2013 онд Францын Альпын нуруунд цанаар гулгаж яваад хүнд гэмтэл авснаас хойш хэвтэрт байгаа бөгөөд түүний эрүүл мэндийн байдлын талаар гэр бүлийнхэн нь олон нийтэд мэдээлэхээс татгалзсаар байгаа юм.
Эх сурвалж: TASS
