Украины асуудлаар Орос, АНУ хоёрын хийж буй хэлэлцээр хоёрдугаар сарын 18-нд Саудын Арабт эхэллээ. Оросын талаас Гадаад хэргийн сайд Сергей Лавров, Ерөнхийлөгч Владимир Путины туслах Юрий Ушаков нар оролцож байгаа бол АНУ-ын талаас Төрийн нарийн бичгийн дарга Марко Рубио, Үндэсний аюулгүй байдлын зөвлөх Майк Уолтц, Ойрхи Дорнодын асуудал хариуцсан тусгай элч Стивен Уиткофф нар удирдаж байна.
АНУ-ын төлөөлөгчдийн танилцуулга
Марко Рубио – АНУ-ын Төрийн нарийн бичгийн дарга
Марко Рубио Кубын цагаачдын гэр бүлд төрсөн. Түүний гэр бүл Кубын хувьсгалаас өмнө АНУ-д дүрвэн суурьшиж, Фидель Кастро засгийн эрхэнд гарсны дараа АНУ-д бүр мөсөн үлджээ. Рубио 1996 онд хуульч мэргэжил эзэмшиж, Флорида мужийн Төлөөлөгчдийн танхимд ажиллаж байгаад 2010 онд АНУ-ын Сенатын гишүүнээр сонгогдсон.
Тэрээр 2016 онд АНУ-ын Ерөнхийлөгчийн сонгуульд өрсөлдөхийг зорьсон ч Бүгд Найрамдах Намын дотоод сунгаанд Дональд Трампт ялагдсан. Трамптай улс төрийн маргаан өрнүүлж байсан ч дараа нь түүнтэй харилцаагаа сайжруулж, идэвхтэй дэмжигчдийн нэг болсон. 2025 онд АНУ-ын Төрийн нарийн бичгийн даргаар томилогдсон бөгөөд энэ албан тушаалд хүрсэн хамгийн өндөр цолтой Латин Америк гаралтай улс төрч болжээ.
Майк Уолтц – Үндэсний аюулгүй байдлын зөвлөх
Майк Уолтц АНУ-ын армид 27 жил алба хааж, Афганистан, Африк, Ойрхи Дорнодод байлдааны үүрэг гүйцэтгэж байсан тусгай хүчний хурандаа. Тэрээр Пентагоны Батлан хамгаалах бодлогын газрын захирал байсан бөгөөд дэд ерөнхийлөгч Дик Чейнигийн терроризмтой тэмцэх асуудлын зөвлөхөөр ажиллаж байв.
2009 онд Афганистанд олзлогдсон АНУ-ын цэргийг аврах ажиллагааг удирдаж, энэ явдалд хохирол гарсан тул Ерөнхийлөгч Барак Обамагийн засаг захиргааг шүүмжилж байжээ. 2018 онд улс төрд орж, Төлөөлөгчдийн танхимын гишүүн болсон цагаасаа хойш Дональд Трампыг идэвхтэй дэмжиж ирсэн. Хятадын эсрэг хатуу байр суурь баримталдаг бөгөөд 2022 оны Бээжингийн Олимпыг бойкотлохыг уриалж байв.
Стивен Уиткофф – Ойрхи Дорнодын асуудал хариуцсан тусгай элч
Стивен Уиткофф үл хөдлөх хөрөнгийн салбарт бизнес эрхэлдэг бөгөөд Дональд Трампын олон жилийн найз, дэмжигч. 1983 онд хуульч мэргэжил эзэмшиж, Трампын хуульчдын багт ажиллаж байсан ч хожим нь үл хөдлөх хөрөнгийн бизнест оржээ. Нью-Йорк хотод бизнесээ эхлүүлж, Чикаго, Даллас, Филадельфи зэрэг хотуудад үйл ажиллагаагаа өргөжүүлсэн.
Тэрээр 2020 онд Трампын цар тахлын эсрэг эдийн засгийн багт ажиллаж, түүнтэй ойр дотно харилцаатай болсон. Флоридад Трамптай гольф тоглодог байсан бөгөөд нэгэн удаа түүнийг халдлагаас хамгаалсан гэж ярьдаг.
Хэлэлцээрийн үр дүн
Оросын төлөөлөгч Юрий Ушаков хэлэлцээний дараа "хэлэлцээр муугүй явагдаж, талууд өөрсдийн байр суурийг илэрхийллээ" гэж мэдэгдэв. Хоёр орны удирдагчдын уулзалт ойрын хугацаанд болохгүй ч хэлэлцээрийн гол үр дүн нь Трамп, Путин нарын уулзалтыг бэлтгэх чиглэлд ахиц гаргасан явдал болж байна.
Эх сурвалж: iz.ru
