Олон улсын эмэгтэйчүүдийн баярыг тохиолдуулан Төрийн ордонд “Алдарт эхийн одонт ээж” хүндэтгэлийн ёслол зохион байгуулав.
Монгол Улсын Ерөнхийлөгч У.Хүрэлсүх уг ёслолд оролцож, ээжүүд, охид, бүсгүйчүүдэд талархал илэрхийлэн, эрүүл энх, сайн сайхан бүхнийг хүсэн ерөөв. Тэрбээр хэлсэн үгэндээ, ижийгээ шүтэж, эмэгтэйчүүдээ хүндэтгэх олон зууны уламжлалтай монголчууд энэ өдрийг эхчүүд, эмэгтэйчүүддээ хүндэтгэл үзүүлдэг бүх нийтийн баярын өдөр болгон тэмдэглэж буйг онцлов.
Төрөөс хүн амаа өсгөх бодлогын хүрээнд олон хүүхэд төрүүлж, өсгөсөн ээжүүдээ алдаршуулан, Алдарт эхийн 1, 2 дугаар зэргийн одон олгож ирсэн. Энэ жилээс одонт ээжүүдэд олгох мөнгөн урамшууллын хэмжээг хоёр дахин нэмснийг Ерөнхийлөгч тэмдэглэлээ.
Тэрбээр ээжүүдийн хичээл зүтгэл, хайр халамжийн үр дүнд эх орондоо хэрэгтэй, эрдэм номтой, ёс суртахуунтай, эх оронч иргэд төлөвшин бойжиж байгааг онцлон дурдлаа. Мөн өргөө гэр нь инээд баяслаар дүүрэн, үр хүүхдүүд нь аз жаргалтай, өнөр өтгөн байхыг ерөөв.
“Алдарт эхийн одонт ээж” хүндэтгэлийн ёслолд 21 аймаг, нийслэлийн төлөөлөл болсон 1000 ээж оролцлоо. Уг арга хэмжээг Алдарт эхийн одонт ээжүүдийн холбоо, Ерөнхийлөгчийн Тамгын газар, Монголын эмэгтэйчүүдийн холбоо хамтран 19 дэх жилдээ зохион байгууллаа.
