Украины Зэвсэгт хүчин бие бүрэлдэхүүний хомсдолд орсон нь гол асуудал болж байгаа талаар Financial Times, CNN, The New York Times зэрэг томоохон хэвлэлүүд онцолжээ. Мөн Курск мужийн Сужи хотыг Оросын цэргүүд эзэлсэн нь Киевийн байр суурийг сулруулсан гэж шинжээчид дүгнэж байна.

Украины гол асуудал – бие бүрэлдэхүүний хомсдол

Financial Times-ийн мэдээлснээр, зэвсэг, сум хэрэгслээс илүүтэй цэргийн алба хаагчдын хомсдол Украины хамгийн тулгамдсан асуудал болжээ. Фронтын зарим хэсэгт анги, нэгтгэлүүд ердөө 30-50%-ийн бүрэлдэхүүнтэй байгаа тул эрх баригчид 18-24 насныханд санхүүгийн хөнгөлөлт амлаж, армид элсэхийг уриалж байна.

Гадаад бодлогын судалгааны хүрээлэнгийн шинжээч Роб Ли:

• "Украины армийн байлдааны хүчин чадал орголтын түвшинг тогтворжуулж, цэргүүдээ нэгтгэн барих чадвараас өндөр хамааралтай" гэжээ.

Зеленский: Гал зогсоох ямар ч нөхцөл харагдахгүй

The New York Times-ийн мэдээлснээр, АНУ-ын Ерөнхийлөгч Дональд Трамп 30 хоногийн хугацаатай гал зогсоох хэлэлцээрийн талаар эерэг хүлээлттэй байгаа бол Украины Ерөнхийлөгч Владимир Зеленский Путины тавьж буй урьдчилсан нөхцлүүд хэлэлцээрийг удаашруулж байна гэж мэдэгджээ.

Зеленский украинчуудад хандсан оройн мэдэгдэлдээ:

• “Оросын хариултыг урьдчилан таамаглахад амархан. Тэдний нөхцөлүүд хэт олон тул юу ч бүтэхгүй” гэж онцолжээ.

Сужи хотыг Орос эзэлсэн нь Киевийн хувьд томоохон ухралт болов

CNN-ийн мэдээлснээр, Оросын арми Курск муж дахь украинчуудад эзлэгдсэн байсан Сужи хотыг эргүүлэн авсан байна. Энэ нь ОХУ-ын хувьд стратегийн болон бэлгэдлийн томоохон ялалт болжээ.

• Оросын Жанжин штабын дарга Валерий Герасимов:
  • “Украины армийн эзэлсэн Курск мужийн 86%-ийг ОХУ буцаан авсан”
  • “430 гаруй украин цэргийг олзолж, үлдсэн хэсгийг бүсэлсэн” гэж мэдээлэв.

ЕХ Украинд туслах шинэ сан байгуулахаар төлөвлөж байна

Euractiv-ийн мэдээлснээр, Европын Холбоо (ЕХ) Украинд үзүүлэх цэргийн тусламжийг нэмэгдүүлэх зорилготой шинэ сан байгуулах санал гаргажээ.

• ЕХ энэ жилдээ багтаан хамгийн багадаа 20 тэрбум евро, боломжтой бол 40 тэрбум евро цуглуулах зорилт тавьжээ.
• Сангийн анхны хөрөнгө оруулалтаар их бууны хоёр сая сум бэлтгэхэд 5 тэрбум евро зарцуулахаар төлөвлөсөн байна.
• Оросын царцаагдсан хөрөнгийн хүүгийн 1.9 тэрбум еврог санхүүжилтэд оруулах хувилбарыг ч авч үзэж байна.

Эх сурвалж: Financial Times, The New York Times, CNN, Euractiv