Сангийн сайд Б.Жавхлан Засгийн газрын өнөөдрийн хуралдаанд “Уул уурхайн бүтээгдэхүүний олборлолтыг нэмэгдүүлэх замаар экспортын нэмэлт орлого бүрдүүлэх, гадаад валютын улсын нөөцийг нэмэгдүүлэх” чиг үүрэг бүхий ажлын хэсгийн анхны тайланг танилцуулсан талаар мэдээлэв.
Тэрбээр:
"Энэхүү ажлын хэсгийг өнгөрсөн долоо хоногт байгуулсан. Тухайн үед валютын улсын нөөц 4.5 тэрбум ам.доллар байсан ба уг нөөцийг 4, 5-р сар гэхэд 5.4 тэрбум ам.долларт хүргэхээр ажиллаж байна. Өмнө нь валютын улсын нөөц дээд хэмжээндээ 5.4 тэрбум ам.доллар хүрч байсан бөгөөд үүнээс ч давуулах зорилт тавьсан" гэв.
Гол асуудал: Нүүрсний экспортын гацаа
- Урд хил дээр 9.5 сая тонн нүүрсний овоолго үүссэн.
- Цар тахлын үед 20 сая хүртэл тонн нүүрсний овоолго үүсч байсан тул одоогийн нөхцөл байдал харьцангуй гайгүй боловч энэ гацааг арилгахгүй бол уул уурхайн бүтээгдэхүүний биржийн арилжаа явахгүй.
- Нүүрсний үнэ намраас хойш 30-40 хувиар унасан нь асуудлын гол шалтгаан болж, худалдан авагч компаниуд татан авалтаа зогсоожээ.
Шийдэл: Үнийн уян хатан бодлого ба биржийн шинэ журам
Сангийн сайдын мэдээлснээр, үнийн уян хатан бодлогыг бирж дээр тогтоох асуудлаар:
- Сангийн яам
- Санхүүгийн зохицуулах хороо
- Монголын хөрөнгийн бирж
- Холбогдох бусад байгууллагууд
хуралдаж, шинэчилсэн журмыг Засгийн газрын өнөөдрийн хуралдаанаар баталжээ.
"Ингэснээр уг журмаар биржийн арилжааг явуулах боломж бүрдэж байна" гэж тэрбээр онцлов.
Ажлын хэсэг долоо хоног бүр Засгийн газрын хуралдаанд тайлангаа танилцуулж байх аж.
