Суданы Зэвсэгт хүчин Хартум хот дахь ерөнхийлөгчийн ордныг хяналтдаа авсан тухай /2025.03.21/ тус улсын телевиз болон олон улсын мэдээллийн агентлагууд мэдээлжээ. Ордон дотор цэргүүд байгаа нь олон нийтийн сүлжээнд тавигдсан дүрс бичлэг, гэрэл зургуудаас харагдана.
Нийслэлийн төвийн зарим дүүрэгт үе үе буун дуу сонсогдож байгаа тухай Ройтерс агентлаг уг үйл явдлыг нүдээр үзсэн хүмүүсээс эш татан мэдээлжээ. Цэргийнхэн ордныг эргүүлэн хяналтдаа авсан гэж Суданы Мэдээллийн сайд Халед аль-Айзер X хуудсандаа нийтэлсэн байна.
Армийн хэвлэлийн төлөөлөгч Набил Абдалла мэдэгдэхдээ, манай армийнхан дайсны босогчид, техник хэрэгслийг бүрэн устгаж, их хэмжээний зэвсэг техникийг олзлон авсан гэв. Хоёр жил орчмын өмнө хагас цэрэгжсэн Шуурхай хариу арга хэмжээ авах хүчинд /RSF/ эзлэгдсэн ордноос хэдхэн зуун метрийн зайд цэргүүд ирээд байгаа талаар пүрэв гаригт мэдээлж байв.
Франс Пресс агентлаг цэргийн эх сурвалжаас эш татан мэдээлснээр, Суданы цэргийнхэн өмнөд зүг рүү ухрахыг оролдсон 30 тээврийн хэрэгсэл бүхий RSF-ийн цувааг устгасан байна. Цэргийнхэн давшсаар нийслэл Хартум хотыг хяналтдаа авчээ.
Армийн командлагч Абдель Фаттах аль-Бурхан болон түүний орлогч асан, RSF-ийн командлагч Мохамед Хамдан Дагло нарын хооронд 2023 оны дөрөвдүгээр сараас хойш зөрчил мөргөлдөөн үүсжээ. Байлдааны ажиллагааны улмаас олон арван мянган хүн амиа алдаж, олон сая хүн дүрвэсэн байна.
Дэлхийн Эрүүл мэндийн байгууллагын мэдээлснээр, Суданы дайны улмаас хамгийн цөөндөө 20 мянган хүн амиа алдсан бол зарим мэдээгээр, 150 мянган хүн амиа алджээ. НҮБ-ын мэдээллээр, Суданд хамгийн цөөндөө 10 сая хүн орон гэрээ орхин дүрвэсэн нь дэлхий дээр хамгийн том шилжилт хөдөлгөөний хямралыг үүсгээд байна.
