Туркийн сөрөг хүчний Бүгд найрамдах ардын нам (БНАН) Истанбул хотын дарга Экрем Имамоглуг ерөнхийлөгчийн сонгуульд нэр дэвшүүллээ. Гэсэн ч гуравдугаар сарын 23-нд түүнийг авлига, терроризмын хэрэгт буруутган баривчилж, шоронд хорьсон нь дотоодын болон олон улсын хэмжээнд хүчтэй шүүмжлэл дагуулав.

БНАН-ын дарга Озгюр Озель Туркийн Ерөнхийлөгч Режеп Тайип Эрдоганд хандан “сонгуулийг хугацаанаас нь өмнө явуулж, Имамоглугийн эсрэг шударга өрсөлдөөн өрнүүлэх”-ийг уриалсан байна. Намын сунгаанд 15 сая хүн оролцож, тэдний 13.2 сая нь Имамоглуг дэмжсэн нь ард түмний дэмжлэг өндөр байгааг харуулж байна.

Түүнийг терроризмын хэргээр шалгаж, тус улсад хориглосон Курдийн Ажилчны Намыг дэмжсэн хэмээн буруутгаж байгаа ч Имамоглу бүх хэргийг няцаасан байна. Түүнийг гуравдугаар сарын 21, 22-нд байцааж, 23-ны өглөө шүүхийн шийдвэрээр хорьжээ. Мөн өдөр Туркийн Дотоод хэргийн яам түүнийг Истанбул хотын даргын үүрэгт ажлаас нь түр чөлөөлсөн бөгөөд түүний орлогчийг ойрын өдрүүдэд сонгохоор болжээ.

Имамоглугийн баривчилгааг эсэргүүцсэн жагсаал гуравдугаар сарын 19-нөөс хойш үргэлжилж, олон зуун хүн баривчлагдаад байгаа бол эрх баригчид нийтийн цуглаан зохион байгуулахыг хориглож, арга хэмжээг чангатгажээ.

Харин Европын Зөвлөл болон Германы Засгийн газар уг баривчилгааг хүчтэй шүүмжилж, "улс төрийн өрсөлдөөнд шүүх, шоронг ашиглах нь ардчилалд ноцтой ухралт" болохыг онцлон, Туркийн эрх баригчдад түүнийг нэн даруй суллахыг уриалсан байна.

Эх сурвалж: DW, Anadolu.