Өнгөрсөн амралтын өдрүүдэд Өмнөд Солонгосын зүүн өмнөд нутагт 20 гаруй түймэр дэгдсэний улмаас дөрвөн хүн амиа алдаж, олон мянган хүнийг нүүлгэн шилжүүлжээ.
Ойн түймрийг унтраахаар гал сөнөөгч, цагдаа, төрийн албан хаагчдаас бүрдсэн 9000 орчим хүн, 120 нисдэг тэргийг таван бүс рүү илгээсэн байна.
Сөүлээс өмнө зүгт 300 км-ийн зайд орших Өмнөд Кёнсан мужийн Санчон хотод баасан гаргийн үдээс хойш зүлэг тэгшлэгчээс оч дэгдсэний улмаас эхний түймэр дэгдсэн гэж Дотоодын аюулгүй байдлын яамны тайланд дурджээ.
Ой хээрийн түймрийг унтраахаар илгээсэн төрийн дөрвөн албан хаагч амиа алдсан гэж Ёнхап агентлаг мэдээлсэн байна. Түймрийг бүрэн унтрааж чадаагүй байгаа бөгөөд 1464 га талбай шатжээ.
Гал түймрийн улмаас 2740 хүнийг нүүлгэн шилжүүлэхээс өөр аргагүйд хүрсэн бөгөөд тэдний ихэнх нь түр хоргодох байранд байрлаж байна. Түймэрт 162 байшин барилга шатаж сүйджээ.
Ерөнхий сайдын үүрэг гүйцэтгэгч Чой Сан Мок оршин суугчдыг нүүлгэн шилжүүлэх, гал түймэртэй тэмцэж буй хүмүүсийн аюулгүй байдлыг хангахын тулд бүх хүчээ дайчлахыг үүрэг болгосон байна. Улсан хот, Өмнөд болон Умард Кёнсан мужуудад онцгой байдал зарлажээ. Өмнөд Солонгост ой хээрийн түймэр ихэвчлэн хуурайшилт ихэсдэг 2, 3, 4 дүгээр саруудад дэгддэг.
Эх сурвалж: CNN
