Австралийн Ерөнхий сайд Энтони Альбанезе өнөөдөр хэвлэлийн бага хурал хийж, ирэх тавдугаар сарын 3-нд бүх нийтийн сонгууль зохион байгуулагдах болсныг зарласнаар тус улсад таван долоо хоног үргэлжлэх сонгуулийн кампанит ажил албан ёсоор эхэллээ.
Альбанезегийн тэргүүлдэг Лейборист нам 2022 оны сонгуульд ялалт байгуулан олонх болж байсан ч сүүлийн үеийн санал асуулгаар сөрөг хүчний Либерал-Үндэсний эвсэл хүчтэй өрсөлдөх төлөвтэй байна.
Ерөнхий сайд Альбанезе мэдэгдэлдээ:
“Манай засгийн газар дэлхий нийтэд тулгарч буй бэрхшээлүүдийг австрали маягаар даван туулж, амьжиргааны өртгийн өсөлтөд нэрвэгдсэн хүмүүст туслахын зэрэгцээ ирээдүйн бүтээн байгуулалтад чиглэсэн бодлого хэрэгжүүлж байна. Австрали улс ард иргэдийнхээ хүч, тэсвэрийн ачаар хөгжин дэвжиж байна. Тиймээс тавдугаар сарын 3-нд бид улам урагшлах замыг хамтдаа сонгох болно” хэмээн онцолсон байна.
Өнөө өглөө Ерөнхий сайд Амбан захирагч Сэм Мостинтэй уулзаж, сонгууль явуулах зөвшөөрөл хүссэн бөгөөд Австралийн Үндсэн хуулийн дагуу Ерөнхий сайд сонгуулийг зарлахын тулд Их Британийн хаан Чарльзыг төлөөлж буй Амбан захирагчаас зөвшөөрөл авах шаардлагатай байдаг.
Австралид парламентын сонгууль гурван жил тутамд зохион байгуулагдах хуультай бөгөөд энэ удаад сонгуулийг 2024 оны 5-р сарын 17-ны дотор явуулах ёстой юм.
Эх сурвалж: Reuters
