Коста-Рика улсын Ерөнхийлөгч асан, Нобелийн Энх тайвны шагналт Оскар Ариасын АНУ-д нэвтрэх визийг цуцалсан талаар тэрбээр мягмар гарагт сэтгүүлчдэд мэдээллээ. АНУ-ын эрх баригчдаас түүнд ирүүлсэн цахим шууданд визийг түдгэлзүүлсэн тухай товчхон мэдэгдэл байснаас өөр ямар нэг шалтгаан дурдаагүй байна.
О.Ариас энэ оны хоёрдугаар сард өөрийн Facebook хуудсаар дамжуулан АНУ-ын Ерөнхийлөгч Дональд Трампыг “Ромын эзэн хаан шиг аашилж байна” хэмээн шүүмжилсэн бөгөөд энэ мэдэгдлээс хойш хэдхэн долоо хоногийн дараа ийм шийдвэр гарчээ. Мөн тэрбээр АНУ-ыг “дайсан хайж буй улс” гэж тодорхойлсон нийтлэл бичиж, Трампын засаг захиргааны гадаад бодлогыг ил тод шүүмжилсэн байна.
Түүний шүүмжлэл АНУ-ын Төрийн нарийн бичгийн дарга Марко Рубиогийн Коста-Рикад хийсэн айлчлалын өмнөхөн гарсан бөгөөд бүс нутаг дахь Хятадын нөлөөг хязгаарлах чиглэлтэй АНУ-ын шахалт, цагаачдыг албадан буцаах ажиллагаанд Коста-Рикагийн оролцоог тэрбээр шүүмжилж байжээ. О.Ариасын шүүмжлэлтэй зэрэгцэн, АНУ Коста-Рикагийн зарим хууль тогтоогчдын визийг ч хүчингүй болгосон байна.
84 настай О.Ариас нь Коста-Рикагийн Ерөнхийлөгчөөр 1986-1990 болон 2006-2010 онд хоёр удаа сонгогдон ажиллаж байсан бөгөөд 1987 онд төв Америкийн зэвсэгт мөргөлдөөнүүдийг зогсоох энх тайвны санаачилгаараа Нобелийн Энх тайвны шагнал хүртсэн юм.
Эх сурвалж: DW
