Дундаж орлоготой орнуудын хөгжлийн асуудлаарх Нэгдсэн Үндэстний Байгууллагын өндөр түвшний уулзалт энэ сарын 1-нд АНУ-ын Нью-Йорк хотноо болов. Энэхүү уулзалтаар “Тогтвортой хөгжлийн 2030 хөтөлбөр”-ийн хэрэгжилтийн явц дахь дундаж орлоготой улс орнуудад тулгарч буй эдийн засаг, нийгмийн сорилтуудыг хэлэлцэж, шинэ арга, аргачлал бүхий дэмжлэг, хамтын ажиллагааны талаар санал солилцлоо.
Дэлхийн банкны ангиллаар өнөөдөр 100 гаруй улс дундаж орлоготой орны тоонд багтаж, дэлхийн нийт хүн амын 75 хувь нь эдгээр оронд амьдарч байна. Тэдгээр орнуудын хөгжлийг урагшлуулахад уламжлалт хэмжүүрүүд болох дотоодын нийт бүтээгдэхүүн (ДНБ)-ээс гадна бусад үзүүлэлтүүдийг авч үзэх шаардлага байгааг оролцогчид онцлов.
Монгол Улсаас НҮБ-ын дэргэд суугаа Байнгын төлөөлөгч Н.Анхбаяр уулзалтад хэлсэн үгэндээ манай улс 2024 онд дунджаас дээгүүр орлоготой орны ангилалд орсныг тэмдэглэн, дэлхийн санхүүгийн бүтэц, дэг журмыг илүү хүртээмжтэй, үр ашигтай болгох чиглэлээр НҮБ-ын Ерөнхий Ассамблейн 79 дүгээр чуулганаар баталсан “Ирээдүйн төлөөх гэрээ”-ний хэрэгжилтийг түргэвчлэхийг уриалсан байна.
Түүнчлэн, Далайд гарцгүй хөгжиж буй орнуудын 2024-2034 оны Үйл ажиллагааны хөтөлбөр хэрэгжиж эхэлсэнтэй холбогдуулан, тэдгээр орны дэд бүтцийн хөгжил, хөрөнгө оруулалтыг нэмэгдүүлэх асуудалд олон улсын банк санхүүгийн байгууллагууд, хөгжлийн түншүүд илүү анхаарахыг Монгол Улсын зүгээс онцолжээ.
Эх сурвалж: Гадаад харилцааны яам
