Ерөнхийлөгч Дональд Трамп АНУ-ын худалдааны алдагдлыг үндэсний аюулгүй байдалд заналхийлж буй хүчин зүйл хэмээн тодорхойлж, улс орон даяар онц байдал зарласнаа албан ёсоор мэдэгдлээ. Тэрбээр “энэ аюулын эх үүсвэр АНУ-ын гадна оршиж байна” хэмээн онцолжээ.

Трампын тайлбарласнаар, худалдааны тэнцлийн алдагдал нь АНУ-ын эдийн засаг болон үндэсний аюулгүй байдалд “онц ноцтой аюул” учруулж байгаа бөгөөд энэ нь голчлон худалдааны түнш орнуудын эдийн засгийн бодлого, дэлхийн худалдааны тогтолцооны тэнцвэргүй байдлаас шалтгаалж буй аж.

Тэрбээр цааш нь “АНУ ба түүний худалдааны түншүүдийн хоорондын харилцаанд харилцан ашигтай байх зарчим алдагдсан. Татварын хэмжээ, татварын бус хориг, мөн эдийн засгийн бодлогын зөрчил нь АНУ-ын цалин хөлс, хэрэглээ буурахад нөлөөлсөн” гэж мэдэгдсэн байна.

Онц байдал зарласнаар Ерөнхийлөгч Трамп импортын бараанд ногдуулах татварын хэмжээг нэмэгдүүлэх, хариу арга хэмжээ авах эрх мэдэлтэй болж байгаа юм. Тэрбээр АНУ-ын эдийн засгийн ашиг сонирхлыг хамгаалах зорилгоор 10-50 хувийн хариу татвар ногдуулж буйгаа зарласан бөгөөд уг бодлогоо “эдийн засгийн тусгаар тогтнолын тунхаглал” гэж нэрлэсэн байна.

Энэхүү шинэ тарифын бодлого:

• Дөрөвдүгээр сарын 5-наас эхлэн 10 хувийн суурь татвар хэрэгжинэ.

• Дөрөвдүгээр сарын 9-нөөс бүрэн хүчин төгөлдөр үйлчилж эхэлнэ.

Трампын энэхүү шийдвэр нь олон улсын худалдааны тогтолцоонд хүчтэй нөлөө үзүүлэх магадлалтай бөгөөд АНУ-ын худалдааны түнш орнууд хэрхэн хариу арга хэмжээ авах нь анхаарал татаж байна.

Эх сурвалж: CNN.