Ватиканы хэвлэлийн албанаас мэдээлснээр, Пап лам Францис тархинд цус харвасны улмаас комд орж, улмаар зүрхний дутагдлын улмаас 88 насандаа таалал төгссөн байна. Тэрбээр даваа гаргийн өглөө 07:35 цагт Ватиканд комд орсон бөгөөд эмнэлэгт уушгины хатгааны улмаас хэвтэн эмчлүүлж байжээ. Эмнэлгээс гарснаас хойш сар орчмын дараа нас барсан тухай албан ёсоор баталжээ.
Францис гэрээслэлдээ өөрийг нь Гэгээн Мариагийн сүмд оршуулахыг хүссэн бөгөөд Аргентин, Бразил улсууд долоо хоногийн гашуудал зарлаад байна. Оршуулгын тов албан ёсоор зарлагдаагүй ч энэ долоо хоногийн сүүлээр болох төлөвтэй байгаа аж. Өмнөх Папуудыг нас барах үед дөрөв буюу зургаа дахь өдөр оршуулах уламжлалын дагуу энэ нь дөрөвдүгээр сарын 25-наас 27-ны хооронд явагдаж болзошгүй.
Түүний оршуулгын ёслолд АНУ-ын Ерөнхийлөгч Дональд Трамп оролцоно гэдгээ илэрхийлсэн нь түүний хоёр дахь бүрэн эрхийн хугацаанд анх удаа гадаад айлчлал хийх тохиолдол болж байна.
Пап Францисын дараа хэн түүний залгамжлагч болох вэ гэдэг олон улсын анхаарлын төвд байна. Латин Америк гаралтай анхны Пап байсан тэрбээр дэлхийн Католик шашинд шинэ хуудас нээсэн билээ. Түүнийг залгамжлах магадлалтай хүмүүсийн тоонд:
-
Кардинал Луис Антонио Тагле (Филиппин) – “Азийн Францис” гэж нэрлэгддэг
-
Кардинал Пьетро Паролин (Итали) – сүмийн фракцуудын хооронд “гүүр” болох чадвартай
-
Кардинал Питер Турксон (Гана) – Африкийн Сахарын урд бүсээс анхны Пап болох боломжтой
Түүнчлэн Франц, Испани, Унгар, Мальта, АНУ зэрэг орноос нэр дэвшигчид мөн яригдаж байна. Пап лам нарыг сонгох үйл явц болох “конклав”-т зөвхөн 80-аас доош насны, нийт 120 орчим кардинал оролцох эрхтэй бөгөөд энэхүү нууц санал хураалтаар шинэ Папыг тодруулдаг уламжлалтай.
Эх сурвалж: DW, Vatican Press
