ОХУ-ын ерөнхийлөгч Владимир Путин тавдугаар сарын 8-наас эхлэн гурван өдрийн хугацаанд гал зогсоох шийдвэрээ танилцууллаа. Энэ шийдвэрийг ОХУ ялалтын баярыг тохиолдуулан гаргасан байна. Харин Украины Гадаад хэргийн яамнаас "дор хаяж 30 өдрийн турш" гал зогсоох шаардлагатайг онцолжээ.

Украины ерөнхийлөгч Володимир Зеленський уг шийдвэртэй холбогдуулан, "Яагаад ч юм бүгдээрээ тавдугаар сарын 8-ныг хүлээгээд, зөвхөн тэр үед гал зогсоох ёстой юм шиг байна. Ингэснээр Путин парадын үеэр тайван байх нөхцөл бүрдэх аж. Бид хүмүүсийн амийг чухалчилдаг болохоос парадыг биш" хэмээн мэдэгдсэн байна.

Кремлийн зүгээс өмнө нь улаан өндөгний баярын үеэр мөн 30 цагийн турш гал зогсоох шийдвэр гаргаж, Украин ч зөвшөөрсөн ч хугацаа дуусаагүй байхад талууд бие бие рүүгээ довтолсон хэмээн харилцан буруутгасан тохиолдол гарсан юм.

2022 онд дайн эхэлснээс хойш талууд 20 гаруй удаа түр хугацааны гал зогсоох оролдлого хийсэн ч бүрэн амжилттай хэрэгжсэн тохиолдол одоогоор байхгүй байна. АНУ-ын зүгээс талуудыг бүрэн галаа зогсоохыг дахин шаардаж буйг онцоллоо.

Эх сурвалж: ВВС