АНУ-ын Небраска мужийн Омаха хотод бямба гарагт болсон “Berkshire Hathaway” компанийн хувьцаа эзэмшигчдийн хурлын үеэр дэлхийн нэр хүндтэй хөрөнгө оруулагч Уоррен Баффет оны эцэст гүйцэтгэх захирлын албан тушаалаасаа огцорно гэдгээ зарлалаа.
94 настай тэрбумтан хөрөнгө оруулагч Баффет Berkshire Hathaway-ийг 1965 оноос удирдаж, нэхмэлийн үйлдвэр байсан тус компанийг 1.1 их наяд ам.долларын үнэлгээ бүхий конгломерат болгон өсгөсөн юм. Хувьцаа, даатгал, эрчим хүч, төмөр зам, хүнсний сүлжээ зэрэг олон салбарыг нэгтгэсэн тус корпораци өдгөө дэлхийн хөрөнгийн зах зээлд онцгой байр суурь эзэлдэг.
Хурлын төгсгөлд Баффет гүйцэтгэх захирлын албан тушаалыг дэд ерөнхийлөгч Грег Абелд шилжүүлэх санал гаргаж, ТУЗ-ийг хуралдуулахаа мэдэгдсэн байна. Энэ мэдэгдэл нь компанийн ТУЗ-ийн гишүүд болон хөрөнгө оруулагчдад урьдчилан хэлэлгүйгээр гэнэтийн шийдвэр байсныг Баффет өөрөө онцолжээ.
Уоррен Баффет өмнө нь тэтгэвэрт гарах бодолгүй байгаагаа удаа дараа илэрхийлж байсан ч, ийнхүү албан ёсоор үүргээ шилжүүлэхээ зарласан нь эдийн засагчид, хөрөнгө оруулагчдын анхаарлыг татаж байна.
Эх сурвалж: DW
