Байгаль орчин, уур амьсгалын өөрчлөлтийн яам (БОУАӨЯ) болон Монгол Улсын Шинжлэх Ухааны Академи (ШУА) хамтран ажиллах санамж бичигт гарын үсэг зурлаа. Уг баримт бичигт БОУАӨ-ийн сайд С.Одонтуяа, ШУА-ийн ерөнхийлөгч, академич С.Дэмбэрэл нар гарын үсэг зурсан бөгөөд зорилго нь “Эгийн голын усан цахилгаан станц” (УЦС) төслийг уялдаа холбоотой, үр ашигтай хэрэгжүүлэхэд оршино.

Тус санамж бичиг нь Засгийн газрын 14 мега төслийн тавдугаарт эрэмбэлэгдсэн Эгийн голын УЦС-ын хүрээнд хийгдэх экологийн суурь судалгааг нэгдсэн зохион байгуулалттай хийх, талуудын үүрэг хариуцлагыг тодорхойлох үндэс суурь болж байна.

Санамж бичгийн хүрээнд:

• БОУАӨЯ нь хэрэгжилтэд шаардлагатай санхүү, зохицуулалт, бодлогын дэмжлэг үзүүлэх, харьяа агентлагуудаас өгөгдөл, мэдээлэл нийлүүлэх, орон нутгийн холбогдох байгууллагуудтай уялдаа холбоо тогтоох үүрэгтэй.

• ШУА нь батлагдсан “Сэлэнгэ мөрний сав газрын экосистемд үзүүлэх өөрчлөлтийг тодорхойлох судалгаа”-ны ажлын I үе шатыг 2025 онд, II үе шатыг 2026 оны эхний хагаст хэрэгжүүлж дуусгах, эцсийн тайланг танилцуулж, хэлэлцүүлэг зохион байгуулсны дараа албан ёсоор хүлээлгэн өгөх үүрэг хүлээжээ.

Энэхүү хамтын ажиллагаа нь экосистемийн өөрчлөлт, байгаль орчны эрсдэлийг урьдчилан үнэлэх, УЦС төслийн шийдвэр гаргалтад шинжлэх ухааны үндэслэлтэй зөвлөмж өгөх чухал алхам гэж талууд онцолж байна.

Эх сурвалж: БОУАӨЯ