Боловсрол, шинжлэх ухааны сайд П.Наранбаяр өнөөдөр хийсэн мэдэгдэлдээ 16 хүртэлх насны хүүхдийг олон нийтийн сүлжээн дэх оролцоог зохицуулах анхны хуулийн төслийг боловсруулж, өргөн барихаар ажиллаж буйг онцлон мэдээлэв.

Уг хуулийн төсөл нь хүүхдийн цахим орчин дахь аюулгүй байдлыг хангах, сэтгэл зүйн болон бие махбодын эрсдэлээс сэргийлэх зорилготой бөгөөд Боловсрол, Гэр бүл, хөдөлмөр, нийгмийн хамгаалал, Харилцаа холбоо, мэдээлэл технологийн яам, Хууль зүй, дотоод хэргийн яамны төлөөлөл бүхий дөрвөн яамны бүрэлдэхүүнтэй ажлын хэсэг дээр ажиллаж байна.

Хүүхдийн төлөө Үндэсний зөвлөлийн шинэчилсэн бүрэлдэхүүнд хуулийн төсөл танилцуулагдаад байгаа бөгөөд цаашид Засгийн газрын хуралдаанд хэлэлцүүлж, УИХ-ын “Д-Парламент” цахим хуудсанд байршуулан олон нийтийн санал авах юм.

Иргэд уг хуулийн төсөлд санал, байр сууриа илэрхийлж оролцох боломжтой бөгөөд хуулийн төслийн үзэл баримтлалд хүүхдийн эрх, цахим орчны зохистой хэрэглээ, насны онцлогт нийцсэн хамгаалалт, эцэг эхийн хяналт зэрэг асуудлыг тусгах аж.

Эх сурвалж: БШУЯ