АНУ-ын Ерөнхийлөгч Дональд Трамп Орос, Украины хооронд 30 хоногийн хугацаанд урьдчилан болзолгүйгээр гал зогсоохыг уриалж, хэрэв энэ саналыг хүндэтгэн үзэхгүй бол Вашингтон болон түүний түншүүд нэмэлт хориг арга хэмжээ авах болно гэж анхаарууллаа.
Украины тал энэхүү саналыг дэмжиж, “энэ мөчөөс эхлэн 30 хоногийн гал зогсооход бэлэн” гэдгээ Ерөнхийлөгч Владимир Зеленский пүрэв гарагт Д.Трамптай утсаар ярихдаа илэрхийлсэн байна. Гэсэн ч Украины Ерөнхийлөгч ОХУ ямар ч нөхцөл, болзолгүйгээр гал зогсоох шийдвэр гаргаж, дайныг эцэслэх бодит хүсэлтэй байгаагаа харуулах шаардлагатайг онцолжээ.
ОХУ-ын зүгээс Дэлхийн II дайны ялалтын 80 жилийн ойтой холбоотойгоор гурав хоногийн хугацаанд гал зогсоох санал тавьсан ч Украины тал үүнийг хангалтгүй гэж үзсэн байна. Украины Гадаад хэргийн сайд Оросын тал гурав хоногийн гал зогсоох дэглэм хэрэгжиж эхэлмэгц хэд хэдэн удаа амлалтаа зөрчсөн гэж мэдэгдээд, уг санаачилгыг “инээдмийн жүжиг” хэмээн нэрлэсэн байна. Харин Оросын тал Украины тал байлдааны ажиллагаагаа үргэлжлүүлсээр байгааг мэдээлжээ.
Д.Трамп нийгмийн сүлжээндээ бичихдээ:
“Хүлээн зөвшөөрөхүйц гал зогсоох хэлэлцээрийг дагаж мөрдөхийг найдаж байна. Шууд хэлэлцээний халдашгүй байдлыг хангах хариуцлагыг хоёр улсын аль аль нь хүлээх ёстой. Энэхүү гал зогсоох хэлэлцээр эцэстээ Энх тайвны хэлэлцээрт хүргэх ёстой бөгөөд үүнийг маш хурдан хийх боломжтой. Хэрэв миний үүрэг оролцоо шаардлагатай бол би тухайн мөчид бэлэн байх болно” гэж онцолжээ.
Энэхүү уриалга хоёр улсын хооронд нөхцөл байдлыг намжаах, цаашдын энхийн хэлэлцээрт хүрэх боломжийг нэмэгдүүлэх чухал алхам болно гэж ажиглагчид үзэж байна.
Эх сурвалж: Reuters.
