АНУ-ын Ерөнхийлөгч Дональд Трамп өнөөдөр буюу тавдугаар сарын 13-нд Саудын Арабт албан ёсны айлчлал хийж, тус улсын нийслэл Риад хотод хунтайж Мухаммед бин Салмантай уулзана. Айлчлалын хүрээнд эдийн засаг, хөрөнгө оруулалтын чиглэлээр хэд хэдэн томоохон гэрээ хэлэлцээр байгуулах хүлээлт үүсээд байна. Трампын зүгээс ирэх нэг жилийн хугацаанд Саудын Арабаас нэг их наяд ам.долларын хөрөнгө оруулалт татах сонирхлоо илэрхийлсэн нь энэхүү айлчлалын гол зорилтын нэг болжээ.

Маргааш буюу тавдугаар сарын 14-нд Трамп Катар улсад очиж, Булангийн орнуудын удирдагч нарын дээд хэмжээний уулзалтад оролцох бөгөөд айлчлалынхаа сүүлийн өдөр буюу тавдугаар сарын 15-нд Арабын Нэгдсэн Эмират улсад хөрөнгө оруулалтын асуудлаар хэлэлцээ хийхээр төлөвлөсөн байна. Тэрбээр Саудын Арабыг АНУ-ын хувьд эдийн засгийн чухал түнш гэж үзэж, өмнө нь ерөнхийлөгчөөр сонгогдохдоо ч хамгийн анхны гадаад айлчлалаа тус улсаас эхлүүлэхээр төлөвлөж байжээ. Гэвч тухайн үед Пап Францис таалал төгссөнтэй холбоотойгоор Ватиканд түрүүлж айлчилсан байдаг.

АНУ-ын эдийн засаг энэ оны эхний улиралд 0.3 хувиар агшсан нь тарифын бодлого зэрэг хүчин зүйлсээс үүдэлтэй хэмээн тайлбарлаж байгаа бөгөөд Трамп “Америк нэгдүгээрт” хэмээх бодлогоо хэрэгжүүлэхэд Булангийн орнуудын үндэсний баялгийн сангаас хөрөнгө оруулалт татахыг чухалчилж байна. Саудын Арабын хунтайж Мухаммед бин Салман энэ оны нэгдүгээр сард АНУ-д 600 тэрбум ам.долларын хөрөнгө оруулалт хийж болох талаар мэдэгдэж байсан бол Трамп уг тоог нэг их наяд ам.долларт хүргэх сонирхолтой байгаагаа илэрхийлжээ.

Айлчлалын үеэр АНУ Саудын Арабт 100 тэрбум ам.долларын зэвсэг, технологи нийлүүлэх гэрээг байгуулах магадлал өндөр байгаа талаар ажиглагчид онцолж байна. АНУ өмнө нь Саудын Арабт тогтмол зэвсэг нийлүүлж байсан ч Жо Байдены ерөнхийлөгчийн үед энэ харилцаа түр зогсож, өнгөрсөн жилээс дахин сэргэсэн билээ. Саудын Арабын хувьд Трампын энэ удаагийн айлчлал нь хоёр улсын эдийн засгийн ойр харилцааг сэргээх, өмнө нь зогсонги байсан хамтын ажиллагааг идэвхжүүлэх боломж гэж үзэж байна.

Эх сурвалж: CNN, Reuters, Al Jazeera