Дэлхийн эрүүл мэндийн байгууллага (ДЭМБ), Олон улсын сувилагчдын зөвлөл (ОУСЗ) болон түнш байгууллагууд хамтран гаргасан тайланд дурдсанаар, дэлхийн хэмжээнд сувилахуйн боловсон хүчний хомсдол ойрын жилүүдэд тодорхой хэмжээнд буурч байгаа ч 2030 он гэхэд тус салбарт нийт 4.1 сая орчим ажиллах хүчин дутагдах төлөвтэй байна.
Сувилагчдын тоо 2018 онд 27.9 сая байсан бол 2023 онд 29.8 саяд хүрч нэмэгдсэн хэдий ч зарим бүс нутаг, ялангуяа бага, дунд орлоготой орнуудад сувилагчийн хомсдол хэвээр байгааг мэргэжилтнүүд онцолжээ. 2020 онд дэлхий даяар сувилахуйн салбарын ажиллах хүчний хомсдол 6.2 сая байсан бол 2023 онд энэ тоо 5.8 сая болж буурсан байна.
Тайланд дурдсанаар, сувилагчдын 78 орчим хувь нь дэлхийн хүн амын ердөө 49 хувийг бүрдүүлдэг өндөр хөгжилтэй орнуудад ажиллаж байгаа нь хүний нөөцийн тэгш бус хуваарилалтыг тодорхой харуулж байна. Харин бага, дунд орлоготой улс орнууд сувилагчдыг сургаж, ажилд авч, тогтвортой ажиллуулахад санхүүгийн болон бүтэц, орчны олон бэрхшээлтэй тулгарсаар байгаа аж.
Мэргэжилтнүүдийн үзэж буйгаар, эдгээр улс орнууд дотоодын хөрөнгө оруулалтаа нэмэгдүүлж, сувилахуйн салбарын ажлын байр бий болгох, ажиллах орчныг сайжруулах, хүйсийн тэгш байдлыг хангах бодлого хэрэгжүүлэх шаардлагатай. Үгүй бол энэ хомсдол нь “хүн бүрт эрүүл мэндийн үйлчилгээг хүртээмжтэй хүргэх” зорилгод сөргөөр нөлөөлөх эрсдэлтэй хэмээн тайланд онцолжээ.
Олон улсын сувилагчдын өдрийг тохиолдуулан нийтэлсэн энэхүү тайланд улс орнуудыг сувилагчдын ажиллах нөхцөлийг сайжруулах, мэргэжлийн ур чадварыг дээшлүүлэх, нийгмийн баталгааг хангах, мөн эрүүл мэндийн системийн тогтвортой хөгжлийг дэмжихэд онцгойлон анхаарахыг уриалсан байна.
Эх сурвалж: Reuters, ДЭМБ, ОУСЗ
