Хятад улсын Хүний нөөц, нийгмийн хамгааллын яамнаас албан ёсоор зарласнаар тус улсын хөдөлмөрийн зах зээлд 17 шинэ мэргэжил нэмэгдсэн тухай Kazinform агентлаг мэдээллээ. Энэ нь сүүлийн жилүүдэд дэвшилтэт технологи, дижитал хөгжил хурдацтай өрнөж байгаатай холбоотой юм.
Шинээр нэмэгдсэн мэргэжлүүдийн дотор хил дамнасан цахим худалдааны үйл ажиллагаа хариуцсан менежер, олон дроны нислэг төлөвлөгч, электрон схем зохион бүтээгч зэрэг өнөөгийн технологийн дэвшилд нийцсэн ажлын байрууд багтжээ. Түүнчлэн хиймэл оюуны генератив системийн туршилт, ухаалаг агуулахын үйл ажиллагаа, засвар үйлчилгээ зэрэг 42 төрлийн шинэ ангиллын ажлыг хамарсан өргөн хүрээтэй шинэ ангиллын жагсаалт гаргасан нь онцлог болж байна.
Хятадын эрх баригчид анх 2018 онд шинэ мэргэжлийн албан ёсны жагсаалтыг олон нийтэд танилцуулж байсан бөгөөд 2019-2024 оны хооронд нийт 93 нэр төрлийн шинэ ажил, мэргэжил шинээр бүртгэгдээд байна. Энэ нь тус улсын хөдөлмөрийн зах зээлийн бүтэц эрс өөрчлөгдөж, шинэ технологи, инновацийн хөгжлийг даган шинэ салбарууд үүсч байгааг илэрхийлж байна.
Хятадын Төрийн зөвлөл энэ оны ажлын тайландаа хотуудын түвшинд 12 сая гаруй ажлын байр шинээр бий болгох, ажилгүйдлийн түвшинг 5.5 хувьд барих зорилтыг тавьсан нь хөдөлмөр эрхлэлтийг тогтвортой байлгах, эдийн засгийн өсөлтийг дэмжих бодлогын нэг хэсэг болж байна.
Эх сурвалж: Kazinform
