АНУ-ын Ерөнхийлөгч Дональд Трамп Саудын Арабын угсаа залгамжлах хунтайж Мухаммед бин Салмантай Эр-Рияд хотноо уулзаж, хоёр орны стратегийн түншлэлийг бэхжүүлэх зорилготой хөрөнгө оруулалт, зэвсгийн худалдааны томоохон хэлэлцээр байгууллаа.
Энэ удаагийн гэрээнд АНУ-д үйлдвэрлэсэн зэвсэг, техник хэрэгсэл худалдан авах 142 тэрбум ам.долларын дүн бүхий хэлэлцээр багтсан бөгөөд энэ нь тус чиглэлээр хийсэн хамгийн өндөр дүнтэй худалдан авалтын нэг гэж үзэж байна. Цагаан ордны мэдэгдэлд дурдсанаар, нийт гэрээний хүрээнд Саудын Араб АНУ-д 600 тэрбум ам.долларын хөрөнгө оруулах төлөвтэй байна. Үүнд пуужингаас хамгаалах “Patriot” систем, сөнөөгч онгоц, тэнгисийн аюулгүй байдлын төхөөрөмж зэрэг олон төрлийн зэвсэг багтжээ.
Талууд энэхүү хэлэлцээрийг бүс нутгийн тогтвортой байдалд чухал хувь нэмэр оруулна хэмээн үнэлсэн бөгөөд Саудын Арабын хувьд энэхүү гэрээ нь цэргийн хүчин чадлаа нэмэгдүүлж, бүс нутгийн нөлөөгөө бэхжүүлэх стратегийн алхам гэж үзэж байна.
Д.Трампын Арабын хойг дахь айлчлал цааш үргэлжлэх бөгөөд тэрбээр Сирийн түр Ерөнхийлөгч Ахмед аш-Шараатай уулзалт хийхээр төлөвлөж, тус улсад авсан хориг арга хэмжээг цуцлах зарлиг гаргахаа илэрхийлсэн байна. Үүний дараа Ерөнхийлөгч Трамп Катар болон АНЭУ-д албан ёсны айлчлал хийнэ.
Эх сурвалж: Reuters
