Ардчилсан намын зарим гишүүн өнөөдөр УИХ дахь Ардчилсан намын бүлгийн дарга Д.Цогтгэрэл, намын дарга Л.Гантөмөр, Үндэсний бодлогын хорооны дарга Д.Амгаланбаатар болон АН-аас сонгогдсон 42 гишүүнд хандан хамтарсан Засгийн газраас гарахыг шаардаж, албан бичиг гардууллаа. Энэхүү мэдэгдлийг АН-ын Үндэсний бодлогын хорооны гишүүн Ц.Уянга, намын гишүүд Л.Ганхөлөг, Д.Цогтбаатар нарын төлөөлөл хийв.
Тэд өнөөдрийн улс төрийн нөхцөл байдал, олон нийтийн дунд үүссэн бухимдлыг онцлон дурдаж, Засгийн газрыг эсэргүүцсэн жагсаал зургаа дахь өдрөө үргэлжилж байхад АН-ын удирдлага Засгийн газрыг дэмжиж, Ардын намын “биет төлөөлөгч” мэт ажиллаж байгааг эсэргүүцэж буйгаа илэрхийлэв. Тэдний үзэж буйгаар АН-ын удирдлагууд Ардчилсан намын үзэл санаанаас зөрж, коммунист намын чиг баримжаа руу шилжиж, олон хууль тогтоомж, намаа дотоод дүрмийг зөрчсөн үйлдэл удаа дараа гаргасан байна.
Ц.Уянга "Монголын төр данхайсан, төсөв үлэмж томорч, татварын дарамт нэмэгдсэн нь ард иргэд, бизнес эрхлэгчдийг хүндрэлд оруулж байна. Энэ бол зөвхөн МАН-ын буруу биш, хуулийн үндэслэлгүйгээр байгуулагдсан стандарт бус хамтарсан Засгийн газрын үр дагавар" хэмээв. Түүнчлэн АН-ын гишүүд улс төрийн хариуцлагаа ухамсарлан, ардчиллыг хамгаалах, шударга ёсыг сэргээх, сонгогчдын итгэл найдварыг даахын тулд хамтарсан Засгийн газраас даруй гарах шаардлагатай гэж үзэж байгаа юм.
Д.Цогтбаатар "Өнөөдрийн нийгэмд үүссэн бухимдлын дийлэнх нь улс төрийн намууд үүргээ гүйцэтгэж чадахгүй байгаатай холбоотой. Ардчилсан нам нийгмийн өмнө үүрэг хүлээдэг улс төрийн хүчний хувьд авлига, эрх мэдлийн хуваарилалтад ил тод дуугарч, эрс шийдэл гаргах ёстой" гэж байр сууриа илэрхийлсэн бол, Л.Ганхөлөг "Манай нам Ардын намын дэмжигч биш, харин түүний хянан шалгагч, сөрөг хүчин байх үүрэгтэй" гэв.
Тэд шаардлагынхаа дагуу хамтарсан Засгийн газарт АН-ын төлөөллийг цаашид оролцуулахгүй байх, намын удирдлага албан тушаал эрх мэдэлд бус ардчиллын зарчимд нийцсэн шийдвэр гаргахыг шаардаж буйгаа илэрхийлэв. Мөн энэ шаардлагыг намын 42 гишүүнд, АН-ын УИХ дахь бүлгийн дарга болон дарга нарт албан ёсоор хүргүүлж, тэднээс тодорхой шийдвэрийг хүлээж байгаагаа мэдэгдлээ.
