Монгол Улсын Их Хурлын дарга Д.Амарбаясгаланд өнөөдөр Монгол Улсын Шадар сайд С.Амарсайхан “Стандартчилал, техникийн зохицуулалт, тохирлын үнэлгээний итгэмжлэлийн тухай” хуулийн шинэчилсэн найруулгын төслийг өргөн барилаа.

Энэхүү хуулийн шинэчилсэн найруулга нь олон жил хэрэглэгдсэн хуучин хуулиас үүдэлтэй үл ойлголцлыг шийдвэрлэх, салбар хоорондын уялдааг хангах, үйлдвэрлэл болон импортын чанарыг хяналтад авах зорилготой юм. Одоогийн хүчин төгөлдөр хуульд стандартуудыг “сонгон хэрэглэх” хэмээн зааснаар иргэд, аж ахуйн нэгж, хяналтын байгууллагуудын дунд ойлголтын зөрүү үүсч, хуулийн хэрэглээнд тодорхойгүй байдал үүсгэж байжээ.

Өнөөдрийн байдлаар Монгол Улсад нийт 6730 стандарт хүчин төгөлдөр мөрдөгдөж байгаа ч стандартын хэрэгжилт хангалтгүй байгаагаас хүн, малын эрүүл мэнд, хүрээлэн буй орчинд сөрөг нөлөөлөл үзүүлэх тохиолдол цөөнгүй бүртгэгддэг байна. Иймд шинэ хуулиар дараах үндсэн чиглэлүүдийг тодорхойлсон байна:

• Стандартыг дагаж мөрдөх эрх зүйн үндсийг бий болгох

• Салбар дундын уялдаа холбоог сайжруулах

• Тохирлын үнэлгээний байгууллагын эрх үүргийг нарийвчлах, бодлогоор дэмжих

• Бараа бүтээгдэхүүний зах зээл, хил гааль дээр тохирлын баталгааг шалгах эрх бүхий байцаагчийн чиг үүргийг нэмэгдүүлэх

• Төрийн хяналтаас гадна иргэд, үйлдвэрлэгч, нийлүүлэгч талуудыг хяналт, хэрэгжилтэд идэвхтэй оролцох нөхцөлийг бүрдүүлэх

Шадар сайд С.Амарсайхан төслийн танилцуулгадаа, “Хууль шинэчлэгдсэнээр үндэсний үйлдвэрлэлийг чанарын хувьд ахиулах, экспортыг дэмжих, олон улсын худалдаанд оролцох нөхцөлийг хөнгөвчлөх, хүн амын эрүүл, аюулгүй орчинд амьдрах эрхийг хангасан чухал алхам болно” гэдгийг онцолжээ.

Эх сурвалж: УИХ-ын Хэвлэл мэдээллийн газар