Онцгой байдлын байгууллага 2025 онд “Алба хаагчдын хөдөлмөрийн аюулгүй байдал, эрүүл ахуй, аюулгүй ажиллагааг хангах, сахилга бат, хариуцлагыг дээшлүүлэх” зорилтыг дэвшүүлэн ажиллаж байна. Энэ хүрээнд Хөдөлмөр, нийгмийн хамгааллын яамтай хамтран улсын хэмжээнд үзлэг, шалгалт хийж, алба хаагчдын эрүүл, аюулгүй орчинд ажиллах нөхцөлийг хангах ажлыг эрчимжүүлжээ.
Хөдөлмөрийн аюулгүй байдал, эрүүл ахуйн улсын байцаагчид Онцгой байдлын ерөнхий газрын харьяа 152 байгууллагад үзлэг хийж, хөдөлмөрийн нөхцөлийн үнэлгээ, эрсдэлийн түвшин, үйлдвэрлэлийн ослын бүртгэл, зааварчилгаа, тусгай сургалт, эрүүл мэндийн үзлэг, хамгаалах хувцас, хэрэгсэл хангалт зэрэг олон чиглэлээр хяналт тавьсан байна. Мөн алба хаагчдын амь нас, гэнэтийн ослын даатгалд хамрагдсан эсэхийг шалгаж, шаардлагатай зөвлөмжүүдийг өгчээ.
Үзлэгийн үр дүнг үндэслэн хөдөлмөрийн аюулгүй байдал, эрүүл ахуйн чиглэлээр хийх ажлын төлөвлөгөө гаргаж, мэргэжил арга зүйн зөвлөгөө, сургалтаар дамжуулан алба хаагчдын мэдлэг, хандлагыг дээшлүүлэх, эрсдэлээс урьдчилан сэргийлэх арга хэмжээг үргэлжлүүлэн хэрэгжүүлэхээр боллоо.
Энэхүү ажлын гол зорилго нь хүний амь нас, эрүүл мэндийг хамгаалах, онцгой албанд ажиллагсдыг аливаа эрсдэлээс сэргийлж, аюулгүй, тогтвортой орчинд үүргээ гүйцэтгэх нөхцөлийг бүрдүүлэхэд чиглэж байгаа юм.
Эх сурвалж: ОБЕГ
