Орон нутгийн шийдвэр гаргах түвшинд эмэгтэйчүүдийн оролцоог нэмэгдүүлэх, тэдний манлайллыг сурталчлан, нийгэмд эерэг өөрчлөлт бий болгох зорилгоор УИХ-ын Тамгын газар, НҮБ, Солонгосын олон улсын хамтын ажиллагааны байгууллага (KOICA) хамтран “Бид эмэгтэйчүүд” чуулганыг энэ сарын 21-22-нд Төрийн ордонд зохион байгуулна.

Чуулганд 21 аймаг, 9 дүүргийн ИТХ-ын 143 эмэгтэй төлөөлөгч, 330 сум, 9 дүүргээс 660 төлөөлөгч, нийт 800 гаруй эмэгтэй оролцох юм. Нээлтийн үйл ажиллагаанд УИХ-ын дарга Д.Амарбаясгалан үг хэлэхээс гадна БНСУ-аас Монгол Улсад суугаа Элчин сайд Чой Жин Вон, Японы тэргүүн хатагтай асан Абэ Акиэ, НҮБХХ-ийн суурин төлөөлөгч Матилда Димовска, УИХ-ын гишүүд мэндчилгээ дэвшүүлэхээр оролцоно.

Чуулганы үндсэн илтгэлийг:

• УИХ-ын дэд дарга Х.Булгантуяа “Шийдвэр гаргах түвшинд эмэгтэйчүүдийн оролцоо”,

• ХЭҮК-ын дарга Д.Сүнжид “Орон нутгийн хүний эрхийн төлөв байдал”,

• Сүхбаатар аймгийн ИТХ-ын төлөөлөгч, Баруун-Урт хотын дарга асан М.Төмөрчулуун “Орон нутгийн хөгжилд эмэгтэйчүүд” сэдвээр тус тус тавих юм.

Мөн салбар хэлэлцүүлгүүд дараах сэдвээр зохион байгуулагдана:

• Хүүхэд, гэр бүлийн бодлого – УИХ-ын гишүүн Л.Энхсайхан

• Эрүүл мэндийн бодлого – УИХ-ын гишүүн Д.Ганмаа

• Боловсролын бодлого – УИХ-ын гишүүн Ч.Ундрам

• Эдийн засаг, хөдөлмөр эрхлэлт – УИХ-ын гишүүн Б.Жаргалан

Энэхүү чуулган нь орон нутгийн эмэгтэй төлөөлөгчдийн улс төрийн оролцоог бэхжүүлэх, бодлого тодорхойлогчдын анхаарлыг жендэрийн тэгш байдалд хандуулахад чухал ач холбогдолтой юм.

Эх сурвалж: УИХ-ын Хэвлэл мэдээллийн газар