Татварын ерөнхий газар нь НҮБ-ын Хөгжлийн хөтөлбөрийн Экуаномикс санаачилгын хүрээнд 2023 оны есдүгээр сараас эхлэн “Жендэрийн тэгш байдлын гэрчилгээжүүлэлт” төслийг хэрэгжүүлж, 20 стандарт, 5 чиглэлийн 40 шалгуур үзүүлэлтийг хангах зорилго тавин ажилласан. Тус төслийн хүрээнд 1.5 жилийн хугацаанд хийгдсэн ажлын гүйцэтгэлд хараат бус олон улсын шинжээчдийн баг үнэлгээ хийж, “Мөнгөн гэрчилгээний” болзол хангасан болохыг албан ёсоор мэдэгдлээ.

Ийнхүү Татварын ерөнхий газар нь жендэрийн олон улсын гэрчилгээний болзол хангасан Монгол Улсын анхны төрийн байгууллага болохын зэрэгцээ дэлхийн болон Ази, Номхон далайн бүсийн анхны татварын байгууллага болж байгааг НҮБ-ын Хөгжлийн хөтөлбөрийн Монгол дахь суурин төлөөлөгч Матильда Димовска онцлон тэмдэглэсэн байна. Гэрчилгээг гардуулах ёслол ирэх зургадугаар сард болох бөгөөд тус байгууллага цаашид жендэрийн тэгш байдлын чиглэлээр олсон сайн туршлагаа бусад төрийн байгууллагад түгээн дэлгэрүүлэхэд манлайлан ажиллахаар төлөвлөж байгаа юм.

Эх сурвалж: Татварын ерөнхий газар, НҮБ-ын Хөгжлийн хөтөлбөр