2024 онд Герман улсад улс төрийн сэдэлтэй гэмт хэрэг өмнө байгаагүй хэмжээнд хүрч өссөн тухай Дотоод хэргийн яамнаас гаргасан тайланд дурджээ. Энэхүү өсөлтөд дотоод болон гадаад орчны олон хүчин зүйлс нөлөөлсөн байна. Тухайлбал, тухайн онд болсон олон сонгууль, Газын зурвасын дайнтай холбоотойгоор нийгэмд үүссэн хуваагдал, мөн Европ даяар газар авч буй хэт барууны үзэл зэргээс улбаалж улс төрийн маргаан, уур бухимдал, улмаар хүчирхийлэл нэмэгдсээр байгаа аж.
Тайланд дурдсанаар хэт барууны үзэл суртлаас үүдэлтэй улс төрийн сэдэлтэй гэмт хэрэг нийт 84172 тохиолдлоор бүртгэгдэж, өмнөх оноос 40 хувиар өссөн байна. Мөн улс төрийн сэдэлтэй хүчирхийллийн шинжтэй гэмт хэрэг 15 хувиар нэмэгдэж, 4107 хэрэг болсон нь 2016 оноос хойших хамгийн өндөр үзүүлэлт болжээ. Эдгээр хохирогчдын 45 хувь нь барууны үзэлтнүүдийн үйлдэлд өртсөн гэдгийг мөн тэмдэглэсэн байна.
Цагаач руу чиглэсэн гэмт хэргийн тоо ч эрс өсчээ. Машинтай дайрах, хүйтэн зэвсэг ашиглан халдах зэрэг халдлагууд цагаач олноор төвлөрсөн бүсүүдэд ихээр бүртгэгдсэн байна. Хэт барууны үзэлтнүүдээс гадна хэт зүүний байр суурьтай этгээдүүд ч улс төрийн сэдэлтэй гэмт хэрэг үйлдэж буй ч тэдний учруулсан хохирол харьцангуй бага байжээ.
Европ даяар газар авч буй хэт барууны популист үзэл Германд ч мөн адил эрчимтэй нэвтэрч байна. Эдийн засгийн тодорхойгүй байдал, цагаачлалын эсрэг үзэл, Газын зурвасын дайнд Германы засгийн газар Израилийг дэмжсэн байр суурь зэргээс үүдэн олон нийтийн дунд бухимдал нэмэгдэж, үүний дүнд Германы Альтернатив нам (AfD) улс төрийн орон зайд хүчээ авчээ.
AfD нам 2024 онд гурван орон нутгийн сонгууль, бүх нийтийн сонгууль, мөн Европын Парламентын сонгуульд оролцож, түүхэн дэх хамгийн өндөр санал авч, нөлөөгөө тэлжээ. Гэвч тус намын цагаачдын эсрэг үндсэрхэг байр суурь, исламын орноос ирэгсдийг гэмт хэрэгтнүүдтэй зүйрлэсэн мэдэгдлүүд нь Германы Үндэсний аюулгүй байдлын зөвлөлийн анхаарлыг татаж, тэднийг “хэт барууны туйлшрагч бүлэг” хэмээн тодорхойлоход хүргэсэн байна.
Харин Альтернатив намын зүгээс өөрсдийгөө ардчилалд заналхийлэгч бус харин “улс даяар хүчирхийллийг бууруулах зорилготой” гэж мэдэгдсэн бөгөөд одоогийн байдлаар тус нам Германы Бундестагт суудлын тоогоор хоёрдугаарт бичигдэж байна.
Эх сурвалж: Der Spiegel, Deutsche Welle, Bundesministerium des Innern
