Японд энэ оны дөрөвдүгээр сард цагаан будааны үнэ өнгөрсөн оны мөн үетэй харьцуулахад 98.4 хувиар өссөн нь 1971 оноос хойш бүртгэгдсэн хамгийн өндөр өсөлттэй үзүүлэлт боллоо гэж тус улсын Захиргааны хэрэг, харилцаа холбооны яамнаас мэдээлжээ.
Цагаан будааны үнэ 2023 оны турш тасралтгүй өссөн бөгөөд үүний гол шалтгаан нь байгалийн гамшиг, хэт халууны нөлөөгөөр ургац буурсан явдал юм. Мөн цар тахлын дараах жуулчдын хэт өсөлт будаа зэрэг хүнсний бүтээгдэхүүний эрэлтийг нэмэгдүүлж, улмаар үнэд нөлөөлсөн байна.
Тавдугаар сарын эхээр үнэ сүүлийн дөрвөн сар гаруйн хугацаанд анх удаа буурсан ч өмнөх жилийнхээс бараг хоёр дахин өндөр хэвээр байгаа ажээ.
Будааны үнийн өсөлттэй холбоотой нөхцөл байдал улс төрийн хүрээнд ч нөлөөлж, Хөдөө аж ахуйн сайд Такү Это "найзууд маань надад байнга будаа өгдөг тул өөрөө будаа худалдаж авч үзээгүй" хэмээх хөнгөн хийсвэр мэдэгдлийнхээ улмаас огцорсон юм. Түүний оронд Ерөнхий сайд асан Жүничиро Коизүмигийн хүү, залуу улс төрч Шинжиро Коизүми шинэ сайдаар томилогджээ.
Шинэ сайд “Будаа хариуцсан хүн” хэмээн өөрийгөө нэрлэж, үнийн өсөлтийг тогтворжуулахын төлөө шаардлагатай бүхнийг хийхээ амласан байна.
Эх сурвалж: TASS
