АНУ-ын Сангийн яам 2026 оны эхээр нэг цент буюу пенни зоос үйлдвэрлэхээ бүрэн зогсоохоор шийдвэрлэсэн тухай CNN мэдээлэв. Энэ нь тус улсын зоосны үйлдвэрлэлийн 200 гаруй жилийн түүхийн төгсгөл болох юм. Сангийн яам тавдугаар сард сүүлчийн захиалгаа өгсөн бөгөөд одоогийн үлдэгдэл нөөц дуусмагц зоос үйлдвэрлэл бүрмөсөн зогсох аж.
Нэг центийн зоосыг үйлдвэрлэх өртөг нь өөрийн нэрлэсэн үнээсээ давсан нь энэ шийдвэрийн гол шалтгаан болжээ. Тодруулбал, нэг пенниг үйлдвэрлэхэд нэг центээс их зардал гардаг бөгөөд нийт төсөвт жил бүр ойролцоогоор 56 сая ам.долларын гарзтай байсныг Сангийн яам дурдсан байна. Түүнчлэн хамгийн өндөр өртөгтэй зоос нь 5 центийнх бөгөөд түүнийг нэг бүрийг нь 13.8 центээр үйлдвэрлэдэг аж.
Экс Ерөнхийлөгч Дональд Трамп өөрийн Truth Social платформ дээр “АНУ бараг хоёр центээр зарлагаддаг нэг центийг хэтэрхий удаан үйлдвэрлэлээ” хэмээн шүүмжилсэн байна. Логистик болон тээвэрлэлтийн зардал нь ч зоосны нийт өртгийг улам нэмэгдүүлж байгаа аж.
Нэг центийн зоосыг анх АНУ-ын Зоосны ордон 1792 онд байгуулагдахад гаргаж эхэлсэн бөгөөд 1909 онд Авраам Линкольны мэндэлсний 100 жилийн ойд зориулан түүний хөрөгтэй загвараар үйлдвэрлэсэн түүхтэй. Пенни нь зөвхөн эдийн засгийн төдийгүй соёлын бэлгэдэл байсан ч одоо үүргээ гүйцэтгэж дуусч байна.
Эх сурвалж: CNN, officelife.media, Getty Images
