Дэлхийн эрүүл мэндийн байгууллагын (ДЭМБ) энэ оны ээлжит чуулган өнгөрсөн долоо хоногт Швейцарын Женев хотод болж өндөрлөлөө. Чуулганы онцлох шийдвэрийн нэг нь Палестинд ДЭМБ-ын Женев дэх төв байрны гадаа төрийн далбаагаа мандуулах эрх олгох асуудлыг баталсан явдал байв.
Энэхүү эрх нь зөвхөн ДЭМБ-ын бүрэн эрхт гишүүн орнуудад хамаардаг ч Палестин энэ удаа гишүүн бус орон байсаар атал уг хүндэтгэлийг хүртлээ. Тус саналыг нийт 95 гишүүн улс дэмжсэн бөгөөд дэмжигчдийн дунд БНХАУ, Пакистан, Саудын Араб зэрэг улс багтаж байна. Харин Израил, Унгар, Чех, Герман зэрэг дөрвөн улс эсэргүүцэж, 27 улс санал өгөхөөс татгалзжээ.
Энэ шийдвэр нь Палестины олон улсын тавцан дахь байр суурийг бэхжүүлж буй дараагийн алхам байв. Өнгөрсөн онд НҮБ-ын Ерөнхий Ассамблейгаас Палестиныг албан ёсоор гишүүн улсын статустай болгох шийдвэр гаргасан бол саяхан Франц улс тэднийг тусгаар тогтносон, бүрэн эрхт улс хэмээн хүлээн зөвшөөрөхөө мэдэгдсэн. Эдгээр дэмжлэгүүд нь Палестины хувьд олон улсын зүгээс улам хүчтэй дэмжлэг авч буйг илтгэж байна.
Түүнчлэн Газын зурваст өрнөж буй хямралын нөхцөл байдал, Израилын цэргийн ажиллагаа олон нийтийн анхаарлын төвд байгааг Швейцар дахь Ливаны төлөөлөгч дурдсан бол, Израилын төлөөлөгч энэ шийдвэрийг НҮБ-ын тогтоосон дэг журмыг зөрчсөн, улс төрийн бэлгэ тэмдэг, сэтгэл хөдлөлд хэт автсан алхам гэж хурцаар шүүмжилжээ.
Одоогийн байдлаар дэлхийн 150 гаруй улс Палестиныг бүрэн эрхт улс хэмээн хүлээн зөвшөөрөөд байгаа ч АНУ, Их Британи, Герман, Япон зэрэг голлох гүрнүүд уг байр суурийг хараахан баталгаажаагүй хэвээр байна.
Эх сурвалж: WHO, UN News, Al Jazeera
