Үндэсний Статистикийн хороо, НҮБ-ын Хүн амын сантай хамтран “Жендэрт суурилсан хүчирхийллийн үндэсний судалгаа – 2026” сэдэвт уулзалтыг зохион байгуулж, төрийн болон олон улсын байгууллага, иргэний нийгмийн төлөөлөл, хөгжлийн түншүүд, хувийн хэвшлийн оролцоотой хэлэлцүүлэг өрнүүллээ.

Арга хэмжээний үеэр ҮСХ-ны дарга Б.Батдаваа “Жендэрт суурилсан хүчирхийллийн үндэсний судалгаа–2026” сэдвээр илтгэл танилцуулсан бол НҮБ-ын Хүн амын сангийн бүсийн судалгааны багийн ахлагч Жессика Гарднер жендэрт суурилсан хүчирхийллийг бууруулах олон улсын стандарт, сайн туршлага, техникийн хамтын ажиллагааны талаар танилцуулсан байна.

Судалгааг 2017 онд анх удаа олон улсын аргачлалаар хэрэгжүүлсэн бөгөөд тухайн үед хамтрагчийн зүгээс үйлдэгддэг бие махбодийн болон бэлгийн хүчирхийлэлд нийт эмэгтэйчүүдийн 31.2 хувь нь өртсөн хэмээн хариулж байсан нь анхаарал татсан дүн байв. Уг судалгаа нь жендэрт суурилсан хүчирхийллийн суурь шалтгааныг тодорхойлж, бодлогын түвшинд арга хэмжээ авах шаардлагыг тодотгож өгсөн.

Энэ хэрэгцээ, шаардлага өнөөдөр ч хэвээр байгааг уулзалтад оролцогчид онцлон тэмдэглэсэн бөгөөд хүчирхийлэл, ялгаварлан гадуурхалтаас ангид нийгмийг бий болгоход хүн бүрийн оролцоо, хамтын хүчин чармайлт чухал болохыг онцолж байв. Ирэх 2026 онд зохион байгуулах шинэ судалгаа нь өмнөх судалгааны үр дүнг гүнзгийрүүлэн судалж, илүү нарийн арга хэмжээ боловсруулахад чиглэнэ.

Эх сурвалж: Үндэсний Статистикийн хороо