Сирид амиа алдсан Иорданы цэргийн нисгэгчийн хэрэгт холбоотой байж болзошгүй этгээдийг Шведийн прокурорууд дайны гэмт хэрэг, терроризмын хэргээр шүүхэд шилжүүллээ.
32 настай Осама Крайем нь Шведийн иргэн бөгөөд өмнө нь 2015 оны Парисын, 2016 оны Брюсселийн халдлагад оролцсон хэргээр ял сонсож байжээ. Харин энэ удаа түүнийг “Лалын улс” зэвсэгт бүлэглэлтэй холбоотой, онц ноцтой гэмт хэрэг үйлдсэн гэж үзэн мөрдөн шалгаж байна.
2014 оны арванхоёрдугаар сард “Лалын улс”-ынхан Иорданы нисгэгч Мутат аль-Касасбехийг барьцаалж, улмаар торонд амьдаар нь шатааж, энэхүү харгис бичлэгийг олон нийтэд тараасан нь дэлхий нийтийг цочроож байв. Шведийн прокурорууд О.Крайемийг энэ хэрэгт хамтран оролцсон гэж буруутгаж, тэрээр уг цаазлалтын төлөвлөлт, бичлэгийн үйл явцад оролцсон, мөн бичлэгийг бүлэглэлийн үзэл суртлыг түгээх зорилгоор тараана гэдгийг мэдсээр байсан гэж мэдэгджээ.
Шведийн Прокурорын газрын мэдэгдэлд түүнийг “Лалын улс”-ын бусад гишүүдтэй хамтарч дайны онц ноцтой гэмт хэрэг үйлдсэн гэж үзэж байгаа бөгөөд түүнийг Францаас Швед рүү түр шилжүүлэн Стокхолмын шүүхэд хүлээлгэн өгөөд байна.
Осама Крайем нь "Лалын улс"-ын гишүүнээр Сири, Иракт идэвхтэй үйл ажиллагаа явуулж байсан бөгөөд тус бүлэглэл 2014–2017 онд эдгээр улсад хяналтаа тогтоосон ч, 2019 онд Сирид бүрэн ялагдал хүлээсэн юм.
Одоогоор түүний швед өмгөөлөгчөөс тайлбар аваагүй байна.
Эх сурвалж: Reuters
