Газын зурваст байрлах ХАМАС бүлэглэлийн гол цэргийн удирдагчдын нэг Мохаммед Синварыг Израилын армийн агаарын цохилтоор устгасан талаар тус улсын Ерөнхий сайд Биньямин Нетаньяху лхагва гарагт Израилийн парламентад үг хэлэх үеэр мэдэгдлээ.
Сүүлийн өдрүүдэд Израилын хэвлэлүүд Мохаммед Синвар нь тавдугаар сарын 13-нд Хан-Юнис хотын эмнэлэгт чиглэсэн агаарын дайралтын гол бай байсан талаар мэдээлсэн. Тэгвэл Нетаньяху энэ мэдээллийг баталж, ХАМАС-ын устгасан удирдагчдын жагсаалтад Синварыг оруулсан гэж онцоллоо.
Израилийн арми тухайн үед уг дайралтын талаар тодорхой тайлбар өгөөгүй боловч ХАМАС-ын “удирдлага, командын төв” нь тус эмнэлгийн доор байрлаж байсан гэж мэдэгдсэн юм.
Мохаммед Синвар нь ХАМАС бүлэглэлийн цэргийн гол стратегич, олон жил эрэн сурвалжлагдаж байсан бөгөөд түүний ах Яхья Синвар нь 2023 оны аравдугаар сарын 7-нд Израиль руу хийсэн дайралтыг зохион байгуулсан гол этгээд хэмээн тооцогддог. Израиль түүнийг өнгөрсөн онд устгасан гэж өмнө нь мэдээлж байв.
Харин ХАМАС бүлэглэл энэ удаагийн мэдэгдэлд ямар нэг тайлбар хийгээгүй байна.
Эх сурвалж: Kazinform
