Нийслэлийн төр, захиргааны байгууллагуудын ажилтнууд 2025 оны зургадугаар сарын 1-нээс эхлэн өглөөний 7:00 цагаас оройн 16:00 цаг хүртэл ажиллахаар болов. Энэ тухай шийдвэрийг Нийслэлийн Засаг даргын захирамжаар баталж, уг зохицуулалт энэ оны наймдугаар сарын 31-нийг дуустал хүчин төгөлдөр үйлчилнэ.
Ажлын цагийн шинэ хуваарийг тогтоосноор авто замын ачааллыг бууруулах, төрийн албан хаагчдын ажлын бүтээмжийг нэмэгдүүлэх, мөн гэр бүлийнхэнтэйгээ өнгөрүүлэх чөлөөт цагийг нэмэх зорилго тавьжээ. Уг өөрчлөлт нь нийслэлийн замын хөдөлгөөний оргил цагтай уялдан, өглөөний ачааллыг хуваарилах, оройн хөдөлгөөний урсгалыг эрт тараах боломжтой гэж үзсэн байна.
Харин есдүгээр сарын 1-нээс эхлэн энгийн буюу өмнөх шиг 8:30–17:30 цагийн хуваарьт шилжих бөгөөд энэ хуваарь ирэх оны зургадугаар сарын 1 хүртэл үргэлжилнэ.
Эх сурвалж: Нийслэлийн Засаг даргын Тамгын газар
