Улсын Их Хурлын Тамгын газраас санаачлан Төрийн ордны баруун жигүүрт Хүүхдийн өрөө тохижуулан бэлтгэж, 2025 оны тавдугаар сарын 31-нд анхны зочдоо хүлээн авлаа. Энэхүү өрөө нь бага насны хүүхэдтэй төрийн албан хаагч эцэг, эхчүүдэд зориулсан бөгөөд ажил үүргээ гүйцэтгэх хугацаандаа хүүхдээ түр байрлуулах нөхцөл бололцоог бүрдүүлж өгч буйгаараа онцлог юм.
Нээлтийн үеэр Улсын Их Хурлын Ерөнхий нарийн бичгийн дарга Б.Баасандорж үг хэлэхдээ, Төрийн ордон болон Сүхбаатарын талбай нь тусгай хамгаалалттай бүс тул ийм өрөө нээхэд холбогдох дүрэм, журмыг өөрчлөх шаардлага гарсан тухай дурдаж, олон талын зохицуулалтыг хийсний дараа, Олон улсын Хүүхдийн эрхийг хамгаалах өдрийг угтан энэхүү өрөөг нээж байгаадаа баяртай байгаагаа илэрхийллээ.
Тэрээр “Эцэг, эхчүүд хүүхдээ Хүүхдийн өрөөнд үлдээгээд, камерын хяналтын дор санаа амар ажлаа хийх боломж бүрдэж байгаа нь тэдний ажлын бүтээмжийг нэмэгдүүлэх, улмаар байгууллагын гүйцэтгэл, үр дүнг сайжруулах чухал алхам юм” хэмээн онцлов.
УИХ-ын Тамгын газар 2024–2028 оны стратеги төлөвлөгөөндөө “Хүн төвтэй, хүний эрх, эрх чөлөөг дээдэлсэн үзэл санаа”-г хэрэгжүүлэхийг зорилгоо болгосон бөгөөд энэ хүрээнд төрийн албан хаагчдад илүү ээлтэй орчин бүрдүүлэх ажлуудыг үе шаттай хэрэгжүүлж байгаагийн нэг нь энэхүү хүүхдийн өрөө юм.
Хүүхдийн аюулгүй байдал, тав тухыг бүрэн хангасан, тоглох, амрах, ном унших зэрэг олон үйл ажиллагаанд тохиромжтой уг өрөө нь төрийн байгууллагад ажиллагсдад томоохон дэмжлэг болж байгааг нээлтэд оролцогчид онцолж байлаа.
Эх сурвалж: parliament.mn
