Украины Ерөнхийлөгч Владимир Зеленский ням гаргийн орой хийсэн мэдэгдэлдээ Оросын цэргийн нисэх хүчний баазууд руу дроноор хийсэн томоохон ажиллагаа болох “Аалзны тор”-т оролцсон аюулгүй байдлын албаныханд болон тусгай үүрэг гүйцэтгэсэн бүх хүмүүст талархал илэрхийлэв. Түүний хэлснээр, энэхүү ажиллагаанд жил зургаан сарын турш нарийн төлөвлөгөө, бэлтгэл хангасан бөгөөд 117 дрон, тэдгээрийг удирдсан мөн тооны операторууд оролцсон байна.

Операци нь Оросын Эрхүү, Рязань, Мурманск, Иваново, Амур зэрэг бүс нутгийн цэргийн агаарын баазуудыг онилсон бөгөөд Украины талын мэдээлснээр стратегийн ач холбогдолтой А-50, Ту-95, Ту-22м3 зэрэг 41 онгоц эвдэрсэн байна. Эдгээр онгоцууд нь Украины нутаг дэвсгэр рүү довтлох цохилтын гол зэвсэг байсан бөгөөд Украины аюулгүй байдлын алба тус ажиллагаагаар “Оросын стратегийн далавчит пуужин тээгч нисэх онгоцуудын 34 хувийг устгасан” хэмээн мэдэгджээ. Устгасан онгоцнуудын нийт өртөг ойролцоогоор 7 тэрбум ам.долларт хүрч байгаа аж.

Оросын Батлан хамгаалах яам Украины дроны дайралтын улмаас дөрвөн бүс нутаг болон Амур мужийн нисэх буудлууд цохилтод өртсөнийг хүлээн зөвшөөрсөн байна. Иваново, Рязань, Амурын бүс нутагт агаарын довтолгоог зогсоосон гэж Оросын тал мэдэгдсэн бол Мурманск, Эрхүү мужуудад хэд хэдэн нэгж нисэхийн техник шатсан гэж мэдээлжээ.

В.Зеленский тэмдэглэхдээ, “Бид энэ дайн дуусах ёстой гэдгийг Оросын талд ойлгуулахын тулд боломжтой бүхнийг хийж байна” гэж онцлон хэлсэн байна.

Эх сурвалж: DW